Usurbil izango da ekainaren 18an eta 19an egingo den Jakin Jardunaldiaren egoitza, non euskararen adierazkortasuna eta esanindarra lantzeko eztabaidak, gakoak eta hautuak jorratuko diren. Jardunaldi honen hamabigarren edizioa izango da, eta dagoeneko hamargarren urtez jarraian elkarlanean arituko dira Jakin, UEU eta Usurbilgo Udala.
Ekitaldiaren aurkezpenean parte hartu zuten Agurtzane Solaberrieta Usurbilgo alkateak, Aitor Bengoetxea UEUko zuzendariak eta Haritz Azurmendi Jakineko kideak. Izena emateko epea ekainaren 16ra arte egongo da zabalik, UEUren webgunearen bidez.
Jardunaldiaren lehen egunean, literatura eta ahozkotasunaren arteko harremana, sexu eta genero disidenteen hizkera, adierazpen askatasuna, hizkuntza-teknologien ekarpena eta ahozkotasuna lantzeko esperientzia praktikoak izango dira hizpide. Horretarako, Miren Amuriza, Amaia Alvarez, June Fernandez, Kike Amonarriz, Naiara Perez, Aitzol Astigarraga, Leire Lison eta Julia Marin izango dira hizlariak.
Bigarren egunean, kulturgintzako hautu linguistiko eta ideologikoak, euskarazko idazkeraren adierazkortasuna eta ikus-entzunezko formatu berriek eskaintzen dituzten aukerak aztertuko dituzte. Iratxe Retolaza, Garazi Arrula, Gorka Bereziartua, Danele Sarriugarte, Lander Arretxea, Ana Sarria eta Martin Ziarrusta izango dira mahai-inguru eta hitzaldietako protagonistak. Jardunaldia Jose Luis Otamendiren emanaldi batekin amaituko da.
Antolatzaileen arabera, euskararen etorkizunari begira ezinbestekoa da hizkuntzaren erabilera ez ezik, haren adierazkortasuna, aberastasuna eta sormen gaitasuna ere lantzea. Bi egunetan zehar gogoeta, eztabaida eta esperientzia trukea uztartuko ditu Jakin Jardunaldiaren aurtengo edizioak.
Aitor Bengoetxeak, UEUko zuzendariak, azaldu zuenez, UEUk duela lau urte erabaki zuen Udako Ikastaroak ezagutza partekatzeko ez ezik, gogoeta kolektiborako gune ere bihurtzea. Horren harira kokatu du Jakin Jardunaldia ere, euskararen inguruko kezka eta erronkei ikuspegi akademiko eta sozialetik heltzeko espazio gisa. Aurten aztertuko duten gaiak, euskararen adierazkortasuna eta hiztunen esanindarra indartzeko bideak, interes handia pizten du.
Agurtzane Solaberrietak nabarmendu du Usurbil berriro ere ezagutzaren eta kulturaren topaleku bihurtuko dela jardunaldiei esker. Alkatearen esanetan, gaur egungo testuinguru soziolinguistikoan bereziki garrantzitsua da hizkuntzaren aberastasuna lantzea eta belaunaldi berriei transmititzea, hizkera aberastuz, erabilera-esparru berriak euskaratik izendatuz eta hiztunen konfiantza indartuz.
Haritz Azurmendik azaldu duenez, aurten abiapuntuko galdera nagusia da ea euskara bere adierazkortasuna galtzen ari den edo gero eta zailagoa egiten zaigun errealitate sozial berriak euskaratik izendatzea. Jakinen ustez, egoera horren atzean hizkuntzaren normalizazio falta eta mendeetako minorizazio prozesua daude, baina badira egoerari aurre egiteko tresnak, esperientziak eta irizpideak ere.
