Bisitaren helburua Pasaia Badia Aktiboa (PBA) ekimenaren nondik norakoak ulertzea izan zen, Mugiment Ekintza Planaren barruan kokatzen den estrategia, euskal gizarte aktiboago bat lortzeko. 2018tik, programak herritarrei arreta eskaintzen die, tokiko eragileekin sareak ehunduz eta hainbat programa eta ekimen garatuz, «udalerri aktiboagoa» lortzeko.
Ekimen horien artean, Tipi-Tapa jubilatuentzako irteerak eta Altxa gazte programa nabarmentzen dira, azken honek gazteak ingurune seguru eta hezitzaile batean beren egoera fisikoa hobetzera bultzatzen baititu.
Legebiltzarreko ordezkariek jarduera horiek guztiak zuzenean ezagutzeko aukera izan zuten. Lehenik, Trintxerpe-Pasai San Pedroko anbulatorioa bisitatu zuten, non Pasaiako Orientazio Zerbitzuaren zutabeetako bat dagoen. Osasun zentroko arduradunek azaldu zuten nola egiten dituzten deribazioak, Pasaiako Kirol eta Gizarte Ekintza sailekin zuzeneko harremanetan.
Bisitaren bigarren zatian, Sara Dorronsoro Jarduera Fisiko eta Kirol Arloko arduradun teknikoak, Xabier Rodríguez Pasaia Badia Aktiboa orientatzaileak eta Maddi Marquet Pasaia Badia Aktiboa orientatzaileak estrategiaren xehetasunak azaldu zituzten Udal Aretoan.
Bisitan parte hartu zuten Osasun Batzordeko presidente Elena Lete (Eusko Abertzaleak), Osasun Batzordeko presidenteorde Rebeka Ubera (EH Bildu), Osasun Batzordeko kide Jon Aiartza (Eusko Abertzaleak) eta Ima Garrastatxu (EH Bildu). Horiekin batera, Pasaiako Udal Gobernuko hainbat kide ere izan ziren, Teo Alberro alkatea buru zutela, baita Mugiment Ekintza Planaren arduradun teknikoak eta Pasaiako Udaleko Kirol eta Gizarte Ekintza sailetako ordezkariak ere, OSI Donostiako Lehen Mailako Arretako unitateburuekin batera.
