Errenteria ko ikasleek berriz ere beren konpromisoa erakutsi dute ibaiarekiko. Udalerriko ia 200 gaztek parte hartu dute Fanderiako ibai-eremuko hondakinak jasotzeko ekintza batean, Agenda Eskolar 2030 programaren barruan antolatutako jarduera batean.
Ekintza honen helburu nagusietako bat ibai-eremuari «begirada zabala» eskaintzea izan da. Oiartzun ibaia ez da ura garraiatzen duen ubide bat bakarrik; bizidun ekosistema bat da, bertako landaredia, animaliak, uraren kalitatea, ibai-ertzeko egiturak eta herritarren ohiturak osatzen dutena.
Horretarako, bisita gidatuetan hausnarketa egin dute ibai-ertzeko landarediaren garrantziari buruz, hondakinek sortzen dituzten kalteei buruz, ibaiaren formek biodibertsitatean duten eraginari buruz eta herritarrek egunerokotasunean har ditzaketen konpromisoei buruz. Jardunaldi hauek maiatzaren amaieran egin ziren, Bizarain, Cristobal Gamon, Egiluze eta Telleri-Alde eskoletako lehen hezkuntzako ikasleekin, baita Bizarain, Egiluze, Koldo Mitxelena eta Telleri-Alde eskoletako bigarren hezkuntzakoekin ere.
Jasotako hondakinak identifikatu eta sailkatu ondoren, ikasleek espazio horietan hobetu daitezkeen alderdiei buruzko gogoetak egin dituzte. Horien artean, prebentzioa, zakarrontziak edo seinaleak bezalako azpiegiturak, garbiketa-jarraipena eta ingurumen-hezkuntza nabarmentzen dira. Interbentzioa egin den guneak ibaia bera (bertara bigarren hezkuntzako ikasleak jaitsi direlarik) eta Bakearen parkea (bertan txikienek parte hartu dutelarik) izan dira. Bi gune hauek aukera eman dute ibaiaren eta udalerriko berdeguneen arteko harremana bertatik bertara ezagutzeko.
Urteetan zehar ikastetxeek egindako ekintza honek erakutsi du nola aldatu den ingurunea denborarekin. Izan ere, urtarrilean amaitu ziren Eusko Jaurlaritzako Ura agentziak eta Udalak Fanderiako zubiaren parean ibaiaren ezkerreko ertzean egindako lanak. Lan horiek ibai-ertz zabal eta naturalizatuak sortu dituzte, bertako landaredi autoktonoz finkatuta, eta urmahatx berri bat sortu da, anfibioek eta ur-ekosistemei lotutako faunak bizitokia izan dezaten.
