Azkoitia taldea Gipuzkoako Herriarteko Txapelketako finalean da, eta Tolosaren aurka neurtuko ditu indarrak datorren igandean, ekainaren 28an, 10:30ean, Donostiako Atano III.a pilotalekuan. Azkoitiarrek iazko txapeldun izan zen Astigarraga eta finalerdietan Aia kanporatu dituzte finalera iristeko.
Finalerako bidean egindako lanarekin gustura agertu da Iker Epelde (Azkoitia, 1987) azkoitiarra. "Lan txukuna egin dugu eta nahi bezala joan da", adierazi du. Hala ere, aurreko urteetako txapeldunak bidean izanda ere, Tolosaren aurkako finala oso zaila eta gogorra izango dela aurreikusten du Epelderek, eta talde tolosarra faborito ikusten du.
Gomazko palako Herriarteko txapelketaren berezitasuna da ez dagoela adin mugarik partidak jokatzeko, eta horrek estrategia asko eskatzen duela azaldu du Epelderek. "Kantxara irten arte ez dakigu zeinen kontra ariko garen", esan du, eskuzko modalitatearekin alderatuz, non bikoteak aurrez jakinarazten diren.
Azkoitiak sei bat urte ditu txapelketa honetan parte hartzen hasi zenetik, eta lehenengo edizioan izan ezik, ondorengo hiru irabazi zituen. Azken bi urteetan ez dute finalera iritsi, baina aurten berriro lortu dute, eta Gipuzkoako txapela berreskuratzeko aukera dute.
Epelderek azaldu duenez, aurtengo Herriartekoa hiru modalitatetan ari da jokatzen: eskuzkoa, gomazko palakoa eta erremintakoa. Gomazko palan, hiru partida jokatzen dira jardunaldi bakoitzean: buruz buruko bat kantxa osoan, binakako bat eta buruz buruko bat zazpi koadroren barruan. Horrek lau pilotari behar izatea dakar herri bakoitzeko.
Palako partidek ez dute eskuzko pilotakoek adinako jarraitzaile kopurua biltzen frontoietan. Epelderek aitortu duenez, kanpoan jokatzen dutenean familia eta lagunak joaten zaizkie, eta etxean, pala gustuko duten lagun gutxi batzuk. Hala ere, finalera joatera animatu ditu Azkoitiko pilotazaleak, eta Tolosak ere jende gehiago mugituko duelakoan dago, Donostialdean afizio handiagoa dagoelako.
Azkoitian, pilotan aritzen den jende gehiena gaztetan eskuz aritu izan da, eta palan hasi direnak lagunartean aritzeko edo eskuzkoaz aspertutakoan hasten direla azaldu du. "Gu gomazko paletan hasi ginen eta hor segitzen dugu", esan du, eta ea urteen poderioz gazteak palan hastera animatzen diren.
