Ekimen honek Gipuzkoako goi-mailako sareko bide-segurtasuna eta zoruaren egoera etengabe hobetzea du helburu, foru erakundeak azaldu duenez. Lanek bi fase izango dituzte: lehenengoan, 2026an, 21 kilometro inguru berrituko dira 13 tarte ezberdinetan; bigarren fasean, 2027an, gainerako 25 kilometroak birgaituko dira, aurreikusitako 46 kilometroak osatuz.

Zehazki, AP-8 autobidean, Bilborako noranzkoan, 3,2 kilometro hobetuko dira Mendaro, Elgoibar eta Eibar artean. Behobiarako noranzkoan, berriz, Elgoibarren parean 2,4 kilometro eta Deban parean 4,3 kilometro berrituko dira. AP-636 errepidean, Bergararako noranzkoan, 1,5 kilometro konponduko dira Ormaiztegi eta Ezkio-Itsaso artean, eta 925 metro gehiago Bergaran. Beasainerako noranzkoan, Zumarragan 1,6 kilometroko tarte bat hobetuko da.

AP-1 autobidean, Eibarrerako noranzkoan, hiru tarte berrituko dira: Arrasaten 2,8 kilometro, eta Bergaran 1,9 kilometroko eta 1 kilometroko bi tarte. Horrez gain, GI-20 errepidean, Errenteria eta Pasaia arteko 800 metroko tartea konponduko da bi noranzkoetan.

2027an egingo diren lanen artean, AP-8 autobidean, Bilborako noranzkoan, Zarautzen 1,1 kilometro, Zumaia eta Deba artean 4,5 kilometro, eta Mendaron kilometro bat hobetuko dira. Behobiarako noranzkoan, Deban 660 metro eta Getaria eta Zarautz artean 3,9 kilometro birgaituko dira.

AP-1 autobidean, Eibarrerako noranzkoan, bi tarte berrituko dira: Eskoriatza eta Aretxabaleta artean 2 kilometro, eta Arrasate eta Oñati artean 2,1 kilometro. Gasteizerako noranzkoan, beste bi tarte hobetuko dira: Arrasate eta Aretxabaleta artean 2,1 kilometro, eta Aretxabaleta eta Eskoriatza artean 2 kilometro.