Lehen lanak astearte honetan hasi dira, kalean zeuden piboteak kentzen, eta asteazkenetik aurrera margotze-lanak egingo dira. Euria egiten ez badu, lanek aurreikusitako erritmoan jarraituko dute, baina eguraldiak eragina izan dezake iraupenean.
Azken urteotan, Zarugalde kaleko bizilagunek kezka agertu dute behin eta berriz, ibilgailuen abiadura handiak eragindako segurtasun-arriskuengatik. Kalea oinezkoentzat seguruagoa izatea eskatu dute, batez ere adinekoen eta haurren mugikortasuna bermatzeko. Gainera, bizikidetza sustatuko duen eta eguneroko bizitza kalitate handiagoz garatzeko aukera emango duen espazio atseginago eta lasaiago baten beharra azpimarratu dute.
Esku-hartzearen helburu nagusia kalea oinezkoentzako bihurtzea da, herritarrei atseden hartzeko, jolasteko eta elkarrekin egoteko gune seguruak eskainiz. Aldaketa nagusiak honako hauek dira:
- Oinezkoentzako espazio gehiago: Iparraldeko espaloian espazioa irabaziko da, mugimendu librea ahalbidetzeko.
- Bidegorria: Noranzko biko bidegorri bat planteatzen da; noranzko batean ibilgailuekin partekatua eta bestean bizikletentzat esklusiboa.
- Segurtasuna eta irisgarritasuna: Oinezkoentzako pasabide berri bat instalatuko da, bolardoak kenduko dira eta garajeetako ibilgailuak bakarrik sartu ahal izango dira. Gainera, horiek nabarmen murriztu beharko dute abiadura, hainbat neurriren bidez.
- Espazio atseginak: Lorontziak eta bankuak jarriko dira, herritarrentzat gune atsegin eta lasaiak sortzeko.
Garrantzitsua da azpimarratzea, trafiko orokorra mugatuko den arren, garajeetarako sarbidea eta larrialdietako ibilgailuen igarotzea uneoro bermatuta egongo direla.
Eraldaketa hau hiri-taktika deritzonaren bidez egingo da, hau da, espazio publikoan aldi baterako esku-hartzeen bidez. Obra garesti eta iraunkorrak egin beharrean, pintura eta hiri-altzariak erabiltzen dira proposatutako diseinuak probatzeko. Herritarrei aldaketak ulertzen eta kalean nola jokatu jakiten laguntzeko, Udala k kode bisual argi bat erabiliko du lurrean margotutako formen bidez:
- Zirkuluak (topaguneak): Erabat margotutako guneak elkartzeko eta harremanak izateko.
- Triangeluak (ibilgailuen sarbideak): Perimetroa bakarrik margotuko da eta garajeetako sarrerak eta irteerak markatuko dituzte.
- Lerroak (mugimendua): Oinezkoentzat irabazitako espazioa adierazten dute, non libreki zirkulatu daitekeen.
Esku-hartze hau herritarren segurtasuna eta erosotasuna hobetzeko lehen urrats gisa planteatzen da. Behin eginda, behaketa-prozesu bat egingo da bizilagunekin batera, eraldaketa ebaluatzeko. Zarugalde kaleko bizilagunen aparkalekuak Otalora kalean berreskuratu dira.
