Bergarako Antzerki Musikala taldeak eta Bergarako Musika Eskolak elkarlanean prestatu duten Oskar Wilde idazlearen Erraldoi berekoia ipuin musikala taularatuko dute domekan, Seminarixoan. Bi emanaldi eskainiko dituzte arratsaldez: bata 17:00etan eta bestea 18:30ean. Sarrera doakoa izango da.

Marije Ugalde k (Bergara, 1965) zuzentzen duen lan honek ilusio eta gogo handiz hartu du parte hartu duten 50 ikasle baino gehiagok. Entseguetan lan handia egin dela azaldu du zuzendariak, hiru abesbatza koordinatzea eta antzerkia, dantza eta musika uztartzea ez baita lan makala izan. Gazteenek ahots bakarrean eta nagusiagoek bi ahotsetan kantatzen dute, eta hori guztia eszenaratzearekin batera lantzea erronka izan da.

Ugaldek azpimarratu du proiektu honetan parte hartzen duten ikasleek elkarlanaren garrantziaz jabetu direla, eta adin ezberdinetakoen artean laguntasun eta elkartasun giroa sortu dela. Musikala bullying-aren gaia du oinarri, eta ipuinaren garapenaren isla dela adierazi du, bai gizarteak gai honen inguruan izan duen bilakaeraren baitan, baita haurrek hori nola bizi duten ere.

Lan hau euskaraz antzezten den lehen aldia da. Iñigo Casali ren musika moldaketa euskaratu egin du Valen Moñuxek, eta kantu-jolasak, berriz, Rosa eta Blanka Narbaizarekin elkarlanean txertatu dituzte, garai bateko euskal kanta-jolasak berreskuratuz. Zuzendariak ilusioa eta istorioaren edertasuna nabarmendu ditu, baita haurrek proiektu honetan jartzen duten gogoa ere, lan zaila izan arren.

Bergarako emanaldien ostean, beste antzoki batzuetan ere antzezteko aukera zabalik dagoela adierazi du Ugaldek, nahiz eta ikasle kopuru handia dela eta emanaldi gutxi egin ahal izango dituzten.