Urtero ematen diren dirulaguntza hauek Oñatiko gazteek, gazte-taldeek edo elkarteek sustatzen dituzten kultur jardueretara zuzentzen dira. Bigarren deialdi honetan, bereziki, kultur sormen eta hedapen proiektuak babestuko dira.
Dirulaguntzak jasotzeko baldintza nagusiak honakoak dira: eskatzailea (erakunde, talde edo norbanakoa) oñatiarra izatea eta talde eskatzailearen kideen erdiak gutxienez 12 eta 30 urte bitartekoak izatea. Baldintzak betetzen badira, idazki ofiziala aurkeztu behar da.
Informazio gehiago Gaztelekuan eskura daiteke, baina eskaerak udaletxeko HAZ bulegoan aurkeztu beharko dira, aurrez aurre edo udaleko erregistro elektronikoaren bitartez online.
Udaberrian egindako lehen deialdian, hiru eskatzaileen 5 proiektu babestu ziren, 6.600 euro baino gehiago banatuz. Lee kore eta Sukena taldeek disko eta bideo klip bana grabatzeko laguntza jaso zuten, eta Aiertek EP bat ekoizteko. Hasiera batean dirulaguntzetarako gordetako 15.000 euroetatik, uztailean esleitutako 6.642 euroak kenduta, 8.358 euro geratzen dira orain zabaldu den bigarren deialdi honetan banatzeko.
