Atzo, irailaren 27an, Eskoriatzako pilotalekuan urteroko jubilatuen omenaldia ospatu zen. Ekitaldian 130 jubilatu inguru bildu ziren, 65 urtetik gorakoak denak.
Eguna San Pedro elizan ospatutako meza nagusiarekin hasi zen goizeko 11:30ean. Ondoren, txistularien lagunarekin irten ziren elizatik, eta 14:00etan hasi zen bazkaria pilotalekuan.
Bazkalostean, bertaratutako nagusienak omendu zituzten. Maria Melgar Vivas, 95 urteko emakumea, eta Jose Mª Romaratezabala, 94 urte bete berri dituen gizonezkoa, izan ziren omendu nagusiak. Edorta Zubizarreta alkateak lore sorta bat eman zion Mariari, eta Dorleta Sologaistoa zinegotziak txapela jarri zion Jose Mªri, bertaratutakoen txalo zaparrada artean.
Ondoren, erretiratuen elkarteko kideek opariak banatu zituzten, herriko denda, taberna, banketxe, enpresa eta Udalak emandakoak.
Amaitzeko, Jose Angel Elizondoko musikariarekin dantza saioa izan zuten, eta giro ederrean ospatu zuten eguna.
