Herritarrei erosketa errazteko, pausoz pausoko gida prestatu da, eta sare sozialetan zabalduko da.
Sarrerak erosteko hiru bide daude: webgunea (www.aretxabaletaklik.eus), Aretxabaletaklik mugikorrerako aplikazioa eta Arkupeko harrera.
Webgunetik erosteko, ekitaldien atalera joan, eguna aukeratu, ekitaldia hautatu, “sarrerak erosi” sakatu, eserlekuak aukeratu, datuak bete eta ordainketa egin behar da. Sarrerak eroslearen posta elektronikora iristen dira.
Aplikazioan, erabiltzaile kontua sortu ondoren, egutegian eguna aukeratu, saioak ikusi, eserlekuak hautatu eta datuak bete behar dira. Erosketa-prozesuak denbora mugatua du eta txartelarekin edo Bizum-arekin ordaindu daiteke. Sarrerak posta elektronikoan jasotzen dira.
Ekitaldiaren sarreran, QR kodea erakutsi behar da, mugikorrean zein paperean.
Aretxabaletaklik aplikazioa iaz jarri zen martxan, eta orain sarrerak erosteko aukera gehitu zaio. Aplikazioak herriko inzidentziak bidaltzeko, aretoen erreserbak egiteko, berriak irakurtzeko eta agenda ikusteko balio du.
