Elgeta Palestinarekin elkarteak adierazi du faxismoak eta inperialismoak gerra erabiltzen dutela beren ideologia inposatzeko eta herriak inbaditu eta arpilatzeko. Horregatik, elkarretaratze bat deitu dute maiatzaren 23rako, osteguna, arratsaldeko 19:00etan, Elgetako plazan.
“"Elgeta bonbardaketen, errepresio basatiaren eta okupazioaren mina pairatu duen herria da, eta ahotsa altxatu nahi dugu duela 89 urte Elgetan gertatu zena zein gaur egun Palestinan, Libanon eta Iranen gertatzen ari dena salatzeko."
Hamabost minutuko elkarretaratze isila izango da, eta bertan “Gerrarik ez! Inperialismoari ez!” eta “Heriotzaren negozioari ez!” bezalako leloak aldarrikatuko dituzte. Herritar guztiak mobilizazioan parte hartzera deitu dituzte.
Elkarteak Israelek Gazan eragindako “erabateko suntsipena” eta “blokeo kriminala” salatu ditu, “munduko armadarik gaiztoenak babestuta”. Gainera, Libanoko hegoaldea “garbiketa etniko” honetara gehitzen ari dela adierazi dute, “Estatu judu supremazista handi baten irrika sionistak errepresioa eta heriotza dakarrela palestinar herriarentzat eta inguruko herrialdeentzat” azpimarratuz.
“"Elgetan oroimena eta justizia exijitzen ditugu Elgetaren gaineko bonbardaketak, hildakoak eta errepresaliatuak gogoan ditugunean."
Horrekin batera, frankismoaren eta faxismoaren kontra eta genozidak zigorrik gabe ez geratzeko aldarrikapenaren alde mobilizatuko direla gaineratu dute.
