Lan hauen helburu nagusia espaloiak zabaltzea, zebra-bide gehiago jartzea, espaloi-koskak kentzea eta garaje-sarrerak hobetzea da. Horrela azaldu zieten udal ordezkariek Kale Zaharra eta Kanpantxoko bizilagunei, astelehen arratsaldean egin zuten informazio bileran.
Kale Zaharreko behealdeko zatia oinezkoentzako bide segurua izatea lortu nahi da. Espaloiak zabaldu eta aparkalekuak mantentzearen ondorioz, errepidea estutu eta norabide bakarrekoa bihurtuko da, Otadui Zuhaiztitik Lizaurrerako norantzan. Bizikletan doazenek, joan-etorriko aukera izan dezaten, bidegorria egokituko da erreka ertzeko pasabidean, Lizaur kaletik Otadui Zuhaiztirako bidea bertatik egiteko.
Otadui Zuhaiztia eta Lizaur kalearen arteko inguru honek ezaugarri bereziak ditu: etxebizitza berriak egiten ari dira eta, aldi berean, hurbileko industria gunerako pasabidea da. Horrek kalearen erabilera ezberdinak biltzen ditu. Udal ordezkariek azaldu dutenez, irisgarritasuna hobetzeko lanek ohitura aldaketa ekarriko dute, baina egungo espazio muga gaindituko da eta oinezkoen, bizilagunen eta lantokira egunero joan-etorria egiten duten herritarren segurtasuna nabarmen hobetuko da.
Proiektua inguruko bizilagunei aurkeztu eta hauen ekarpenak jaso ondoren, esleipen prozesuari ekingo dio Udalak, lanak 2027ko lehen seihilekoan hasi ahal izateko. Kale Zaharreko azken tarterako aurreikusi den proiektua bat dator bide seguruak eta irisgarriak eraikitzeko Udalak hartua duen ibilbidearekin; horren adibide dira azken urteotan San Lorentzon, Olakuan, Errekalden eta Mendiko kalean egindako irisgarritasun lanak.
