Aretxabaletan, anbulategi zaharra berritzeko lanak hasi dira, herritarren osasunerako eta ongizaterako gune berri bat sortzeko. POBA proiektuaren barruan, anbulategi zaharra bi erabilera nagusirekin egokituko da: jarduera fisikoaren orientazio zerbitzua eta jubilatuentzako gunea.
Eraikinaren alde batean, bizi-ohitura aktiboak ez dituzten herritarrei zuzendutako zerbitzu bat jarriko dute. Jarduera fisikoa egiten hasi nahi duen edonork aholkuak, gidalerroak eta laguntza jaso ahal izango ditu profesional baten eskutik, ohitura hori egunerokotasunean txertatzeko helburuarekin. Zerbitzuaren ardatza David Health Solution metodologia berritzailea izango da, herritarraren gaitasun funtzionalaren diagnostikoa eginez eta norbanakoaren indarra, mugikortasuna eta koordinazioa hobetzea sustatuz.
Eraikinaren beste aldean, herriko jubilatuentzako gune bat ere egokituko da. Bertan, Basotxo elkartekoek beraien egunerokotasunean aktibitateak aurrera atera ahal izango dituzte, eta adinekoek harremanetarako toki propioa izango dute.
Lanak amaitu eta zerbitzua martxan jartzeko prest dagoenean jakinaraziko da.
