Dwingi Dwingi taldeak bost sarietatik hiru eskuratu zituen larunbatean jokatutako XVII. Oñatiko Laburmetrai Rallyan. Epaimahaiak eta publikoak bat etorri ziren, eta "Hi, bizia" lanari eman zioten lehenengo saria eta publikoarena. Gainera, pertsonaia ugari agertzen diren laburmetraian egindako lanagatik Yeray Varelak interpretazio saria eskuratu zuen.
Bigarren saria Baltzerdi taldearen "Dictaberri" filmak jaso zuen eta hirugarrena, Guggenheim taldearen "Onddo gosez" lanak. Saritutako hiru lanak antolakuntzak emandako pelikula ezberdinekin lotuta zeuden: "Diktadore handia", "2001: Odisea bat espazioan", "Gau bat operan" eta "Psikosi".
Taldeek 11 ordu izan zituzten lanak egiteko, eta hainbat zine-baliabide txertatu behar izan zituzten. Lehenengo bi lanek, gainera, Demasa lehiaketan parte hartuko dute orain, herriz herri eta euskaraz egiten diren laburmetraien lehiaketen arteko txapelketa.
13 taldek eman zuten izena rallyan, eta denek entregatu zituzten lanak garaiz. Lan guztiak ikusgai daude jada ORLren YouTube kanalean. Epaimahaia honako hauek osatu zuten: Itsaso Polek, Miren Maniasek, Unai Portillak eta ekitaldiaren aurkezle lanak egin zituen Aitor Abarok.
