Oinarriak ostiralean, urriaren 23an, argitaratu ziren Gipuzkoako Aldizkari Ofizialean. Eskaerak aurkezteko epea gaur bertan hasi da eta azaroaren 13ra arte egongo da zabalik. Bekaren helburua da artistaren irudimenetik sortutako edozein lan, hala nola musika, pintura, eskultura, literatura, antzerkia, zinema, komikiak, soinu-konposizioak, ikus-entzunezkoak, konposizio digitalak edo dantza-koreografiak, sortzeko laguntza ekonomikoa ematea.
Beka eskuratu ahal izateko, kultur eremuren batean diharduten edo hasi nahi duten pertsona fisikoek zein izaera juridikorik gabeko norbanakoen taldeek edo talde kulturalek aurkeztu ahal izango dute eskaera. Eskatzaileek, edo taldekideek, 16 urte beteak izan behar dituzte eskaera egiten duten egunean. Deialdi honetatik kanpo geratzen dira jada taularatutako, argitaratutako edo jendaurrean aurkeztutako proiektuak.
Bekak gehienez 5.000 euroko zenbatekoa du. Printzipioz, onuradun bakarra izango da, baina Balioespen Batzordeak proiektu gehiago finantzatzea erabaki dezake, puntuazio-hurrenkerari jarraituz.
Proiektuak balioesteko, kontuan hartuko dira, besteak beste, proiektuaren interesa eta kalitatea, publiko berriak sortzeko edo inplikatzeko gaitasuna, Bergararentzat duen garrantzia, diziplina anitzen erabilera, beste eragile batzuekiko sinergiak eta genero-ikuspegia. Beka jasotzeko, gutxienez 35 puntu lortu behar dira. Onuradunak zortzi hilabete izango ditu proiektua amaitzeko, eta lana jendaurrean aurkeztu beharko du, euskaraz.
Eskaerak Udaleko Erregistro Nagusian (B@Z arreta zerbitzuan) edo Udalaren egoitza elektronikoan aurkez daitezke. Eskabide-eredua eta gainerako agirien txantiloiak egoitza elektronikoan eskuragarri daude.
