Etxetik kanpo jokatu behar izan duten arren, Bergarako pilotariek aukera ona zuten finalerako txartela eskuratzeko. Hala ere, ez dute etxeko emaitzari jarraipena eman ahal izan. Partida hasiera kaxkarra izan dute bergararrek, lehenengo neurketa 22-8 galduz. Kadete mailako partida irabazita (22-7) banako berdinketa ezarri dute, baina senior mailakoak erabaki du kanporaketa.
Finalera iristeko 18 tanto behar zituen Bergarak. Julen Aranburu arduradunak adierazi duenez, pilotariak ez dira eroso egon kantxan. Adunakoek lau tanto inguruko aldea lortu dute eta horri eutsi diote partida osoan. "Denbora guztian atzetik joan gara eta partida zaila izan da", gaineratu du Aranburuk.
Adunakoak nagusi izan dira erabakigarrenean, 22-10 irabazita. Horren ondorioz, Bergara finaletik kanpo geratu da. Joaneko eta itzulerako emaitzak berdinduta amaitu badira ere, egindako eta jasotako tanto kopuruan aurretik egon da Aduna.
“"Sekulako ibilbidea egin dugu, eta finala jokatzeko oso aukera ona izan dugu. Ia eskuetan genuen txartela, baina ihes egin digu azken momentuan. Ikasteko balioko digu eta ea datorren urterako ondo prestatzen garen eta ibilbide polita egiten dugun."
Bergarakoek egindako ibilbideari balio handia ematen diote, baina Aranburuk aitortu du "pena handia" sentitu dutela kanporaketa galdu eta gero. Datorren urterako hobeto prestatzea eta ibilbide polita egitea dute helburu.
