Bergarako Udala k eta Laboratorium Museoa k antolatutako ekimenak zientziaren historian herriak izan duen garrantzia balioan jarri du. Aurten 243 urte bete dira Euskal Herrian aurkitu den elementu kimiko bakarra isolatu zenetik.
Ospakizunak zientzia, ondarea, dibulgazioa, artea eta herriari lotutako talentua nabarmendu ditu, Bergarako historia zientifikoa herritarrengana hurbilduz. Ekintzak ZTB k (Zientzia, Teknologia, Berrikuntza) urte osoan garatzen duen programaren barnean kokatu dira.
Programazioa Laboratorium Museoan hasi da, doako bi bisita gidaturekin. Bisitariek erakusketa iraunkorra eta “W74: arrazoia, boterea eta etorkizuna” erakusketa ezagutzeko aukera izan dute, wolframaren aurkikuntzara eta haren testuinguru historikora hurbiltzeko.
Ekitaldi nagusia Seminarixoan egin da, eta bertan Jesus Mari Ugalde Uribe-Etxebarria k jaso du lehen aldiz banatu den ZTB Bergarako Enbaxadore Saria. Aitortza honek Bergararekin lotura duten eta ikerketa, berrikuntza edo kultura zientifikoan ibilbide nabarmena egin duten pertsonak nabarmendu nahi ditu.
Jesus Mari Ugalde Uribe-Etxebarria, EHU ko Kimika Fisikoko katedraduna, bere ibilbide zientifikoagatik eta zientziaren dibulgazioari egindako ekarpenagatik nabarmendu da.
Ekitaldian izan dira Juan Ignacio Perez Iglesias, Eusko Jaurlaritza ko Zientzia, Unibertsitate eta Berrikuntzako sailburua; Gorka Artola, Bergarako alkatea; eta Rosa Errazkin, Laboratorium Museoko zuzendaria, besteak beste.
Gorka Artola alkateak azpimarratu duenez, Wolframaren Eguna ez da iraganeko lorpen bat gogoratzeko bakarrik sortu, baizik eta zientzia, ezagutza eta jakin-mina herritarrengana hurbiltzeko eta etorkizunari begiratzeko.
Juan Ignacio Perez Iglesias sailburuak zorionak eman dizkio Ugalderi eta Bergarari, zientziaren alorrean egiten ari diren ekarpenagatik. Gainera, Elhuyar anaien eta Ugalderen arteko paralelismoa egin du, biek ere beren lurraldetik kanpo ikasketak egin arren, beren ingurune hurbilean eragin dutela azpimarratuz.
Rosa Errazkin ek, Laboratorium Museoko zuzendari a, 1783ko Bergarako laborategi batera bidaia proposatu die bertaratuei, Elhuyar anaien lana gogora ekarriz eta wolframa isolatzearen garrantzia azpimarratuz.
Sari honekin, Udalak eta Laboratorium Museoak Bergarari lotutako talentu zientifiko eta teknologikoari ikusgaitasuna eman nahi diote eta pertsonen arteko loturak indartu.
Jesus Mari Ugalde Uribe-Etxebarria k "ohore handiz eta atxikimendu osoz" jaso du saria, eta bere ibilbidearekin eta Bergararekin duen lotura aitortzea eskertu du, umorez "Bergarako enbaxadore izateraino" iritsi dela adieraziz.
Ugaldek gogora ekarri du Laboratorium Museoaren hastapenetan egindako lana eta Rosa Errazkin en lantaldearen lana, baita 2011n Jakiunde Bergarara ekartzeko eta 2018an Laboratorium Museoa European Science Historic Site izendatzeko egindako bidea ere.
"Izan zirelako gara, eta garelako izango dira", baieztatu du, Bergararen ondare zientifikoaren eta etorkizuneko belaunaldien arteko lotura azpimarratuz.
