Sistema berri honen helburu nagusia da gaur egun Maalako errabala, Gazteluondo kalea, San Frantzisko kalea, Erdiko kalea, Arrasate pasealekua, Mitarte kalea, Olarte kalea (Arbolapeta) eta Zerkaosteta kalea bezalako guneetan dauden pibote fisikoak kentzea, azkenaldian matxura eta arazo ugari sortu dituztelako.
“"Ez dira herritarrak grabatzeko ohiko kamerak; horien funtzio bakarra ibilgailuen matrikulak detektatzea eta irakurtzea da, aparkaleku askotan dagoeneko erabiltzen diren irakurgailuen modura. Horrela, pribatutasuna bermatzen da, gailu hauek soilik trafikoaren kontrolerako eta baimenak egiaztatzeko erabiltzen baitira."
Udalak azpimarratu du instalatuko diren gailuak matrikula-irakurgailu espezifikoak direla, eta ez ohiko bideo-zaintza kamerak. Horien funtzio bakarra ibilgailuen matrikulak detektatzea eta irakurtzea da, pribatutasuna bermatuz eta trafikoaren kontrolerako eta baimenak egiaztatzeko soilik erabiliz.
Sistema berriak hainbat onura ekarriko ditu, Udalaren arabera. Lehenik, segurtasuna eta eraginkortasuna hobetuko dira, larrialdi zerbitzuen (anbulantziak, suhiltzaileak) erreakzio-denbora gutxituko baita, piboteak jaisteko itxaron beharrik gabe. Bigarrenik, matxurak ekidingo dira, pibote fisikoek sortzen dituzten arazo teknikoak desagertuko baitira. Azkenik, oinezkoentzako gunea indartuko da, Alde Zaharra benetako oinezkoentzako gune bihurtuz, ibilgailuen sarrera eta bertan emandako denbora automatikoki kontrolatuz.
Lanak maiatzean zehar egitea aurreikusten da, eta indarrean jarri baino lehen bizilagunekin eta banatzaileekin lanketa egingo da, sistema berrira egokitzeko epea ezarriz. Udalak gaineratu du sistema berri honek datuen babeserako indarrean dagoen legedia zorrotz betetzen duela, eta informazio guztia enkriptatuta gordeko dela.
