Azaroaren 11tik 19ra bitartean, Indiako Ankur umezurztegiaren aldeko neskentzako pijama eta barruko arropa bilketa egingo da. Materiala Almen, Basabeazpi eta Kurtzebarri ikastetxeetako sarreretan jarriko diren kaxetan jasoko da. Antolatzaileek berariaz eskatu dute barruko arropak berriak edo ia berriak eta egoera onean egotea.
Ankur Karitateko Mojeek zuzentzen duten umezurztegia da, Bombay hirian kokatua. Bertan, 2 eta 14 urte bitarteko 220 neskatila bizi dira, kalean aurkitutakoak edo abandonatuak izan direnak. Zentroaren helburua haur hauen oinarrizko beharrak asetzea eta etorkizun duina eraikitzeko hezkuntza bermatzea da. Arrasateko Harreman elkarteak laguntzen dio ekonomikoki proiektuari.
Azaroaren 20an, Haurren Eskubideen Nazioarteko Egunean bertan, hainbat ekitaldi izango dira. 17:00etan, giza katea egingo da Herriko Plazatik Mitarte kaleraino, haur guztien babeserako, hezkuntzarako, osasunerako, jolaserako eta parte-hartzerako eskubideak aldarrikatuz. Musika eskolako trikitilariek lagunduko dute ekimena.
Ondoren, 18:00etan, Herriko Plazan eskulan tailerrak izango dira Ludoteka eta Errefortzu Programako begiraleen eskutik. Aldi berean, Kidam magoak magia-trukoak eskainiko ditu. 18:30ean, guraso elkarteek prestatutako txokolatada bat izango da, eta elkartasun itsulapiko bat jarriko da bidalketa gastuak ordaintzeko.
Antolatzaileek parte-hartzaileei beren edalontzia eramateko eskatu diete hondakinak murrizteko. Amaitzeko, Harreman elkarteak informazio mahaia jarriko du proiektuaren berri emateko. DJ Mikeltxik jarriko dio musika jaiari 19:00etatik 20:30era.
