Kultura eta berdintasun sailek elkarlanean sortutako ekimen honek Aretxabaleta ko arte-lanetan berdintasun eta LGTBIAQ+ begirada bat txertatzea du helburu. Udaletik adierazi dutenez, arte diziplinak kontzientzia sortzeko, gizartea zalantzan jartzeko eta gizarte eraldaketarako tresna dira, baita identitatearen eta memoria kolektiboaren sorkuntzan ere.

Bekak Aretxabaleta n egoitza duten 16 urtetik gorako pertsonei (banaka zein taldeka) edo irabazi-asmorik gabeko elkarteei zuzenduta daude. Parte hartu nahi dutenek gehienez hiru proiektu aurkeztu ahal izango dituzte, betiere ikuspegi feministarekin eta berdintasun, sexu-aniztasun, emakumeen eta LGTBIAQ+ pertsonen ahalduntze, zaintza-ekonomia feminista, indarkeria matxisten prebentzioa eta aitorpena, edota feminismoaren eta LGTBIAQ+ pertsonen memoria historikoaren inguruko gaiak jorratzen badituzte.

Proiektuak euskaraz garatu beharko dira, eta antzerkia, dantza, ikus-entzunezkoak, literatura, plastika, musika edo performance arloetakoak izan daitezke, betiere eskaera aurkeztu aurretik gauzatu gabe egonez gero. Beka 5.000 eurokoa da eta proiektua gauzatzeko epea 12 hilabetekoa izango da, ebazpena argitaratu eta hurrengo egunetik aurrera.

Epaimahaiak, besteak beste, proiektuaren fase guztietan feminismoaren ikuspegiaren txertaketa, ikuspegi intersekzionala, kalitate teknikoa, berrikuntza maila eta Aretxabaleta rentzako lanaren interesgarritasuna baloratuko ditu. Laguntzak lortzeko, gutxienez 45 puntu eskuratu beharko dira 90 puntutik.

Eskaerak aurkezteko epea zabalik dago jada, eta ekainaren 19ra arte aurkez daitezke telematikoki Udalaren egoitza elektronikoan. Informazio gehiago nahi izanez gero, berdintasuna@aretxabaleta.eus helbidera jo daiteke.