Dublinen, azaroaren 2tik 4ra bitartean ospatuko den SME & Cluster Assembly ekitaldian parte hartuko dute SPRIk eta Mondragon Korporazioak. Aurten lehen aldiz, SME Assembly eta European Cluster Conference ekitaldiak elkartu dira European SME Week ekimenaren barruan, Europako ETE eta Klusterren ekitaldi nagusi eta garrantzitsuena bihurtuz.
Ekitaldiaren egitarauaren barruan, 'Hizkuntza abantaila lehiakor gisa: Hizkuntza gutxituen eskualdeek nola bultzatzen duten ETEen hazkundea' izeneko mahai-ingurua izango da. Azaroaren 3an, asteartearekin, 12:00etan hasiko da. Bertan izango dira Jasone Aretxabaleta, SPRIk sustatutako Indeus ekimeneko koordinatzailea, eta Ander Etxeberria, Mondragon Korporazioko Hedapen Kooperatiboaren arduraduna. Euskarak enpresen lehiakortasunean duen papera aztertuko dute.
Mahai-inguruan parte hartuko dute, era berean, Siobhán Ni Ghadhra (Údaras na Gaeltachtaren presidentea eta Danú Mediaren sortzaile eta zuzendari exekutiboa), Lenneke Willems (Marketing arduraduna eta irlandar hizkuntzaren bitartekaria), eta Fionnbarra Bradley (Dublin Hiriko Unibertsitateko irakasle izandakoa). Conall Ó Mórain, ekonomia gaietarako kazetaria eta The Media Groupeko zuzendari nagusia, arituko da moderatzaile lanetan.
Mahai-inguruaren ardatz nagusia hizkuntza gutxituak izango dira, euskarari eta irlanderari azpimarra jarriz. Askotan, tokian tokiko hizkuntzak kultur-ondaretzat baino ez dira kontuan hartzen. Hala ere, Gaeltacht, Euskadi edota antzerako Europako lurraldeetako ETEntzat, hizkuntzen garrantzia haratago doa: bezeroen leialtasuna eta langileen atxikipena lortzeko, merkatuan bereizteko edota hizkuntzen teknologian eta adimen artifizialean sortzen ari diren aukerak baliatzeko.
Indeus, Industriaren Euskal Plataformaren baitan duela bizpahiru urte sortutako ideiaren gauzatzea, SPRIk eta Irlandako Gobernuaren Údarás na Gaeltachta agentziak elkarrekin egindako lanari esker etorri da. SPRIk duela 8 urte jarri zuen martxan Indeus ekimena, euskaraz lan egiten duten eta lan egin nahi duten euskal enpresa industrialei laguntzeko, besteak beste beharrezkoak dituzten produktuak eta zerbitzuak euskaraz lortzen. Dagoeneko 50 enpresatik gora daude Plataformari atxikita.
Údarás na Gaeltachta Irlandako Gaeltacht eskualdeen –hau da, gaeleraz edo irlandarrez hitz egiten den eskualdeen– garapen ekonomiko, sozial eta kulturalaz arduratzen den gobernu-agentzia publikoa da. Eskualde horietan irlandera-gaelera eguneroko hizkuntza nagusia izatea eta etorkizuneko belaunaldiei transmititzen dela bermatzea da bere helburu nagusia.
