Segurtasun Sailak jakinarazi duenez, 33 urteko gizon bat bere borondatearen aurka atxikita zuten Bergarako Alde Zaharreko etxebizitza batean, ustez ordaindu gabe zuen zor baten dirua eskatzeko.
Gertakariaren berri 18:30ean izan zuen Ertzaintzak, bi pertsona Deba-Urolako ertzain etxera joan eta egoera horren berri eman ondoren. Agenteek lau pertsona aurkitu zituzten barruan, horietako gizon batek buruan odola zuela. Osasun laguntza eskatu eta Arrasateko ospitalera eraman zuten.
Biktimak adierazi zuenez, aurreko egunetik zegoen etxebizitzan bere borondatearen aurka. Erasotzaileek kalean aurkitu eta etxera joateko agindu zioten, zor bat kitatzeko. Bertan, bere eta amaren dokumentazioa zein etxeko giltzak kendu zizkioten, zorraren dirua eskatzen zioten bitartean.
Ustezko erasotzaileetako batek biktimaren amarekin batera egoitzara jo zuen, banketxera joan eta zorra ordaintzera behartzeko. Ordainketa egin ez zenez, gizona Bergarako etxebizitzara itzuli zuten.
Ertzaintzak bertan atxilotu zituen 37 urteko emakume bat eta 30 eta 31 urteko bi gizon, estortsioa eta legez kanpoko atxiloketa egotzita. Eginbideak amaitu ondoren epailearen esku jarriko dituzte.
