Azahara Domínguez, Mugikortasuneko, Turismoko eta Lurralde Antolaketako diputatuak, jakinarazi duenez, DB02 lineak (Ermua>Donostia) ohiko indartze-zerbitzuak izango ditu astelehenetik aurrera. Zerbitzu hauek 6:30ean, 7:10ean eta 15:10ean izango dira Donostiarako noranzkoan, eta 14:30ean, 18:30ean eta 19:20an Eibarrerako noranzkoan.
Horrez gain, DG07 linearen (Eskoriatza>Arrasate>Elgoibar>Zarautz>Donostia) 5:50eko zerbitzua indartzeko errefortzu bat egongo da prest, behar izanez gero, Donostiarantz doan bidaian.
Diputatuak azpimarratu duenez, "ikasturtearen hasierak garraio publikoaren erabileran urteko punturik garrantzitsuenetako bat dakar". Horregatik, "aurreko urteetan egin dugun bezala, ohiko moduan indartuko dugu eskaintzen dugun zerbitzua, familiei eta egunero joan-etorriak egin behar dituzten pertsonei ziurtasuna ematen jarraitzeko, garraio publikorako sarbidea bermatuta izan dezaten".
Domínguezek gaineratu duenez, errefortzu hauek "ohiko jarduerara itzultzeak sortzen dituen mugikortasun-beharrei erantzutea ahalbidetzeaz gain, garraio publikoa herritarren eguneroko bizitzan gero eta integratuago dagoela erakusten dute". "Autobusaren alde egiten duenak zerbitzu erosoa, eskuragarria, segurua eta fidagarria aurkitzea nahi dugu", adierazi du.
Diputatuak gogorarazi du errefortzu hauek Eibarko eta Elgoibarko udalekin duten lankidetzaren emaitza direla. Horren harira, Jon Iraola Eibarko alkateari eta Maialen Gurrutxaga Elgoibarko alkateari eskerrak eman dizkie garraio publikoa sustatzeko eta hobetzeko erakutsitako prestutasunagatik.
Jon Iraolak, Eibarko alkateak, adierazi duenez, "Eibar Euskadiko konexio- eta mugikortasun-gune nagusietako bat da, eta garraio publiko fidagarria izatea funtsezkoa da gure herritarrentzat". "Zerbitzuen indartze hauei esker, ikasturte hasierari berme handiagoz egin diezaiokegu aurre, eta data hauetan handitzen den eskariari erantzuten diote", gaineratu du.
Maialen Gurrutxagak, Elgoibarko alkateak, gogorarazi du uztailean Aldundiari eskatu ziotela "elgoibartik pasatu eta Donostiara doazen autobus zerbitzuen errefortzua egitea ikasturte hasieran". "Eskertuta gaude gure eskaerari erantzuteagatik, garraio publikoak herritarren ongizatean eta lurraldearen koesioan zuzenean eragiten dute", baloratu du.
