Jardunaldia Lasturren ospatuko da eta Gipuzkoako bolari eta toka-zale guztiei dago irekita. Antolatzaileen arabera, orain arte ez da horrelako ekitaldirik egin lurraldean, eta helburu nagusia kirol hauetan aritzen diren edo aritu izan diren pertsonak elkartzea da.
Egitaraua goizeko 10:30ean hasiko da, 'hiru txirlo', 'bolatoki' eta toka modalitateen aurkezpenarekin. Ondoren, bertaratzen direnek modalitate horietan aritzeko aukera izango dute, auzoko frontoiaren eta bolatokiaren inguruan antolatuko diren txapelketen bidez.
Kirol jarduerez gain, omenaldiak ere egingo dira, bola eta toka jokoak bizirik mantentzeko lanean aritu diren pertsonen lana aitortzeko. Eguna amaitzeko, bazkaria egingo dute Lasturko tabernan.
