Ekimen honen helburua Ermuan, Ermura, Ermutik edo Ermuko bezalako forma egokiak zabaltzea da, sarritan oker erabiltzen diren beste batzuen aurrean. Lehiaketa 12 urtetik gorako pertsonei zuzenduta dago, eta bakarka zein taldean parte hartu ahal izango dute.

Lanak jatorrizko bideoak izan beharko dira, gehienez ere bi minutuko iraupenekoak, euskaraz egindakoak eta formatu digitalean (avi, mov, mp4 edo GIF). Proposamenak aurkezteko epea apirilaren 26ra arte egongo da zabalik, eta tori.eus plataformaren bidez edo euskara@ermua.eus helbide elektronikora bidali beharko dira, dagokion inskripzio orriarekin batera. Adingabeen kasuan, gurasoen edo tutoreen baimena beharko da.

Guztira 600 euro banatuko dira saritan, bi kategoriatan. Sari nagusia, 400 eurokoa, Euskara Saileko, Euskara Batzordeko, Ermua BHI ko eta Berbalagun programako kideek osatutako epaimahai batek erabakiko du. Herritarren saria, berriz, 200 eurokoa, Barrena.eus webgunean egingo den herri bozketa bidez aukeratuko da, finalistak hautatu ondoren.

Ohi bezala, bozketak hiru astez egongo dira zabalik aurkezpen epea amaitu ondoren. Irabazleak udalaren www.ermua.eus atariaren bidez jakinaraziko dira. Antolatzaileek gogorarazi dute bideoek parte-hartzaileen irudi eskubideak errespetatu beharko dituztela eta ezin izango dutela eduki iraingarririk sartu.