Elgoibar Lagunkoia, Elgoibarko Jubilatuen Biltokia, Nagusilan, Duintasuna eta Elgoibarko Udala bezalako eragileek eta hainbat norbanakok osatzen duten taldeak, nahi gabeko bakardadearen gaian lanketa egin du 2026. urtean zehar, bereziki adineko pertsonengan jarriz arreta. Kanpainaren helburua aisialdiko eta heziketa talde-jarduerak sustatzea da, bakardade hori ikusarazi eta adiskidetasun-loturak sortzeko herritar guztien artean, isolatzeko arriskuan dauden pertsonengan arreta berezia jarriz.
Espainian biztanleriaren %20k pairatzen du nahi gabeko bakardadea, eta ia erdiek bizi izan dute noizbait. Euskadin, zifra %14,5ekoa da, eta 75 urtetik gorakoen artean, %20 inguru dago egoera horretan. Elgoibar Lagunkoiak nabarmendu duenez, bakardade hori bizi-egoerekin lotuta egon ohi da, hala nola galera familiar edo laboralekin, ingurune-aldaketekin, osasun-arazoekin edo sozializatzeko aukera faltarekin. Gainera, tabua izateak zaildu egiten du laguntza bilatzea.
Taldeak adierazi duenez, "kontua ez da bakarrik bakardadeari aurre egitea, baizik eta pertsonen arteko loturak egin eta ongizate kolektiboa indartzea". Horregatik, kanpaina pilotua programatu dute "ELKARREKIN BIDEAN, HARREMANAK SORTUZ" lelopean.
Egitarauak hainbat ekitaldi barne hartzen ditu: "Loturek garrantzia dutenean. Gogoeta partekatua" izeneko zineforuma Olaia Arana k gidatuta, 2026ko irailaren 22an, 18:00etan, Aita Agirre Kulturguneko Areto Nagusian. Jarraian, "Bakardadea eta bizitzaren zentzua" hitzaldi-solasaldia ere Aranarekin, 2026ko irailaren 24an, ordu berean eta leku berean. Azkenik, "Elkarrekin bidean, harremanak sortuz" izeneko paseotxo bat antolatu da 2026ko urriaren 8an, 10:00etan, Elgoibarko Jubilatuen Biltokian, giro hurbilean harremanak sortzeko espazio erraz bat eskaintzeko.
Topaketa informal hauek isolamendu-egoerak murrizteko pentsatuta daude, bereziki adinekoen artean. Elgoibar Lagunkoiak herritar guztiak gonbidatu nahi ditu jarduera hauetan parte hartzera.
