Etxebizitza eta Agenda Urbana Ministerioak, Isabel Rodríguez buru duela, Eibarko alkate Jon Iraolaren eskaerari erantzun dio, eta 3 milioi euroko dirulaguntza bideratuko du Murrategi auzoko eraikinen birgaikuntza, eta hiri zein landa eremuaren berroneratze eta eraberritze lanetarako.
Laguntza hau jada jasota dago 2026ko aurrekontu ekitaldirako dirulaguntzen emakida zuzena arautuko duen Errege Dekretu proiektuan. Errege Dekretuaren behin betiko testua, alegazioak egiteko epea ekainaren 24an amaitu ondoren, datozen asteetan argitaratuko da.
Jon Iraola alkateak eta bere zinegotziek hilabete hauetan Etxebizitza eta Agenda Urbana Ministerioarekin egindako kudeaketek fruituak eman dituzte. Alkateak eskerrak eman dizkie Isabel Rodríguez ministroari eta Denis Itxasori, Eusko Jaurlaritzako Etxebizitza sailburuari, bereziki auzoaren beharrekiko sentikortasunagatik.
Halaber, auzoko bizilagunen pazientzia eskertu du alkateak, nahiz eta prozesuak espero baino gehiago luzatu diren. "Ez dugu lan egiteari utzi laguntza ekonomiko bat lortu arte, auzoa hobetzeko ezinbestekotzat jotzen duguna", gaineratu du Jon Iraolak.
Dirulaguntza hau, EH Bilduren zuzenketa baten ondorioz sortu zen, Espainiako Gobernuak 2022ko aurrekontu orokorretan onartua, eta orain arte ez zen sartu Etxebizitza Ministerioaren urteko dirulaguntzen artean.
Alkateak nabarmendu du albiste honen garrantzia, udal gobernuak "bere kudeaketa gaitasuna" erakutsi duelako eta hirirako proiektu estrategikoak bultzatzeko funtsak lortzeko gai garela berriro ere, aurretik Industria Armagintzaren Museoarekin eta beste proiektu batzuekin egin bezala.
Dirulaguntza, besteak beste, auzoko azpiegituren eta espazioen hobekuntzarako erabiliko da, baita eraikinen multzoaren eta sarbideen hobekuntzarako ere. Horretarako, Murrategiko Auzoaren Birgaikuntza Integraturako Plan Bereziaren gidalerroak jarraituko dira.
Jon Iraola alkateak amaitu duenez, EH Bildurekin eta auzoko bizilagunekin adostuko dira Murrategin gauzatuko diren ekintza zehatzak.
Murrategiko Auzoaren Birgaikuntza Integraturako Plan Berezia 2021eko otsailean onetsi zuen Udalak. Planak, 2016ko azterlan sozio-urbanistiko batean oinarrituta, auzoko ehun urbanistikoa zaharberritzea, babestea, kontserbatzea eta hobetzea du helburu, baita bizilagunen bizi-baldintzak hobetzeko neurriak proposatzea ere.
Dokumentuak auzoko sei eraikin eta 28 etxebizitza finkatzen ditu. Gainera, lurzoruak eskuratzea parke eta aparkaleku bihurtzeko, sarbideak hobetzea, galtzadak konpontzea, argiztapena hobetzea eta hiriko altzariak jartzea aurreikusten da.
Plan Berezia onetsi zenetik, Udalak bertako proposamenak aplikatzen lan egin du. 2022an, Planaren eraginpeko bi lursail eskuratuta hasi zen birgaikuntza. Horrez gain, Udalak Ego ibaiaren eta bere bazterren berroneratzea kudeatzen ari da, Eusko Jaurlaritzarekin eta Gipuzkoako Foru Aldundiarekin batera.
