Jaiak koordinatzeko mahaiak deitutako protestan, "elkartasuna eta babesa" erakutsi zieten erasoak jasan dituzten emakumeei, eta argi utzi zuten "ez dagoela inolako justifikaziorik indarkeria matxistarako". Bertaratutakoek aldarrikatu zutenez, indarkeria matxistak "ez du tokirik Urduñan", eta "erantzun kolektiboa" antolatzeko deia luzatu zuten horren aurka borrokatzeko.

Halaber, gogorarazi zuten badaudela "arretarako eta laguntzarako baliabideak", bereziki jaietarako prestatutakoak, hala nola puntu morea eta txosnetan aktibatutako protokoloa.

Jaien antolatzaileek "komunitate gisa" erantzutearen garrantzia azpimarratu zuten, "elkar zainduz eta indarkeria matxistarekiko zero tolerantziarekin". Horregatik, "udalerri osoari" eskatu diote "konpromisoa har dezan errespetuan eta berdintasunean oinarritutako jaiak eraikitzeko".