Astelehenetik, Gipuzkoatik ekarritako 447 modeloko hiru tren daude martxan Urduña eta Bilbo lotzen dituen C-3 linean. Tren hauen erdiko bagoiko ate zentralak arrapala du eskaileren ordez, irisgarritasuna hobetzeko asmoz. Hala ere, iragan astean Maria Luisa Goikoetxeak, Urduñako bizilagunak, ohartarazi zuen trenen irisgarritasunak ez duela zertan zerbitzu osoaren irisgarritasuna bermatzen, ez baitaude geltoki guztien altuerara egokiturik.
Araudiak zehazten du nasa eta trenaren arteko distantziak ezin duela 7,5 zentimetro gainditu eta desnibelak ezin duela 5 zentimetro baino gehiago izan. Fekoor elkarteak geltokiz geltoki neurtu du irisgarritasuna, eta C-3 lineako irisgarritasun mapa osatu du mugikortasun murriztua duten pertsonentzat.
Geltokiak hiru koloretan sailkatu dituzte: berdea irisgarri eta seguru direnentzat, laranja araudia gutxigatik gainditzen duten edo zailtasunak sor ditzaketenentzat, eta gorria arriskutsu eta ez irisgarri direnentzat. Urduñatik Bilborako noranzkoan, Urduña, Amurrio, Amurrio Iparralde, Laudio, Areta, Arakaldo, Basauri, Bidebieta-Basauri, Miribilla eta Abando dira geltoki berdeak. Arrankudiaga, Arrigorriaga eta La Peña laranjak dira, eta Iñarratxu, Salbio, Luiaondo, Laudioko Santa Kurutze, Arbide, Bakiola, Ugao, Abaroa San Miguel eta Ollargan gorriak.
Bilbotik Urduñako noranzkoan, nasa aldatzen denez, sailkapena desberdina da: Abando, Miribilla, La Peña, Bidebieta-Basauri, Arrigorriaga, Arbide eta Urduña dira berdeak. Bakiola, Arrankudiaga, Areta, Laudio, Amurrio Iparralde eta Amurrio laranjak, eta Ollargan, Abaroa-San Miguel, Basauri, Ugao, Arakaldo, Laudioko Santa Kurutze, Luiaondo, Salbio eta Iñarratxu gorriak.
“"Ordutegia begiratzeko unean "Irisgarriak" aukera aktibatzea gomendatzen diegu mugikortasun arazoak dituzten erabiltzaileei, bai trenaren zein geltokiaren aldetik egokia den zerbitzua jakiteko."
Hori dela eta, Fekoor elkarteak aholkatu die mugikortasun arazoak dituzten erabiltzaileei Renferen webgunean ordutegia kontsultatu eta "Irisgarriak" aukera aktibatzea, beren beharretarako egokia den zerbitzua zein den jakiteko. Horretarako, Renferen arreta telefonoak ere erabil daitezke: 944 879 256 / 912 320 320.
