Lanpostu honek hainbat zailtasun izan ditu azken bi urteetan. 2024ko otsailean, aurreko buruzagia kargutik kendu zuten, “gertutasunezko polizia lortzera bidean” urratsak emateko helburuarekin. Orduan hasi zen arduradun berria hautatzeko prozesua, baina hilabetez luzatu zen, bi hautagaiek uko egin baitzioten lanpostuari.
Azkenean, Jon Agirrebengoa Barturen ek hartu zuen kargua urte hartako azaroan, Deustuko Udaltzaingo-etxeko buru izandakoak. Hala ere, hiru hilabete eskas iraun zuen postuan, dimisioa aurkeztu baitzuen iazko otsailean, aurreko kargura itzultzeko. Hori dela eta, urtebete baino gehiago iraun duen gabezia hori betetzera dator orain abiatu duten hautaketa prozesu berria.
Udaltzaingoaren berezko gaiei buruzko aholkularitza ematea alkateari eta gobernu-taldeari, bere ardurapeko agenteen jarduera planifikatzea eta zerbitzua antolatu zein gainbegiratzea dira arduradun berriaren funtzio nagusiak.
Laudioko Udalak zehaztu duenez, arduradun berriak funtzio hauek bete beharko ditu: alkateari eta gobernu-taldeari aholkularitza ematea Udaltzaingoaren gaiei buruz, agenteen jarduera planifikatzea, zerbitzua antolatu eta gainbegiratzea, udalerri barruko eta kanpoko koordinazioa egitea, polizien prestakuntza egokia eta eguneratua ziurtatzea, udal-espedienteak izapidetzea, eskakizun judizialak betetzea eta herritarrei arreta eman eta kontsultak ebaztea.
Interesdunek apirilaren 27ra arte dute prozesuan izena emateko aukera. Eskaerak Udalaren webgunean edo Herritarrentzako Arreta Zerbitzuan tramitatu daitezke.
