Ainize Gastaka Laudioko alkateak Azalera podcastean egindako elkarrizketa batean jakinarazi duenez, Goikoplazan babes ofizialeko 80 etxebizitza baino gehiago eraikitzeko lanak hastear daude. Udalak lursaila Eusko Jaurlaritzari laga zion proiektu honetarako, eta aurreikuspenen arabera, 14 hilabetetan amaituko dira lanak.

Alkateak azaldu duenez, ostiralean hustu zen eremua, eta dagoeneko hesitu egin dute. Etxebizitza berri hauek herriguneko aparkaleku ugari desagertzea ekarriko dute, baina Gastakak gogorarazi du hilabete barru Latiorron aparkaleku gune berri bat irekiko dela.

Latiorroko aparkaleku berria anbulatorio berrira lotuta egongo da eta doakoa izango da beti. Hasieran denbora-mugarik ez badago ere, Udalak mugimendu mota aztertuko du eta horren arabera erabakiko du erabilera orduak murriztea, osasun sistema publikora jotzen dutenei lehentasuna emateko.

Bestalde, Gastakak adierazi du Ugarteko auzokideek futbol zelaian estalkia jartzeko egindako eskaera ez dela bideragarria, URA Agentziak debekatu egin baitu. Alkatearen iritziz, pena bat da, tokia jarduera komunitarioetarako erabili ahal izango zelako.

Azkenik, Laudioko alkateak iragarri du urtea amaitu baino lehen Apaloetako 20 mahai metalikoak kenduko dituela Udalak. Mahai horiek arriskutsuak direla umeentzat adierazi dute bizilagunek, eta horregatik hartu da erabaki hori.