ETB1eko 'Ztanda' talent showaren hirugarren denboraldia maiatzaren 8an itzuliko da pantailara, eta parte-hartzaileen artean Laudioko abeslari bat dago. Txikitatik musikaren munduan ibilbidea egitea izan du amets, eta programaren castinga aukera paregabea zela ikusi zuen.
“"Lau abesti jo nituen nire gitarrarekin. Handik eta aste batzuetara deitu zidaten barruan nengoela esateko eta segituan hasi ginen entseguekin."
Nahiz eta talent showaren atal guztiak grabatuta egon, abeslariak ezin du ezer aurreratu gertatutakoari buruz. Hala ere, bizitako esperientzia "bizitzan behin baino gertatzen ez diren gauza horietako" bat dela azpimarratu du. Musikaren munduan sakontzeaz gain, bere "erregistroa probatzeko" helburuarekin joan da programara. Bost urterekin hasi zen abesbatzan kantatzen, eta han ikasitakoa programan islatu duela azaldu du.
'Ztanda'-n bizitakoak ikasketa berriak ekarri dizkio. "Jende pila bat ezagutu dut eta asko ikasi dut bai nire kideengandik eta baita programako lantaldearengandik ere", adierazi du. Horregatik, musikan ibilbidea sakondu nahi duen edonori gomendatzen dio horrelako aukerarik ez pasatzen uzteko, "ate berriak zabaltzen baitira".
