Azterlan honek, Laudioko Eguzki Mapa izenekoak, eraikin bakoitzari buruzko informazio zehatza eskaintzen du, energia berriztagarria sortzeko ahalmena eta emisioak murrizteko ekarpena zehaztuz. Carmen Altuna zinegotziak adierazi duenez, dokumentuak udalerriaren energia-ereduaren iraunkortasunerako bidea errazten du.
Laudiok 90,09 GWh/urteko eguzki-energia sortzeko potentziala du, eta horrek esan nahi du ekoizpen fotovoltaikoak elektrizitate-eskariaren %47 estali dezakeela. Horrela, egoitza- eta hirugarren sektoreetan autosufizientzia lor liteke. Egoitza-sektoreak, 1.462 eraikinekin, 22,59 GWh/urteko energia sor lezake, 2023ko kontsumoa (16,47 GWh/urteko) gaindituz.
Industria-sektoreak, 403 eraikinekin, teilatu handienak ditu eta, beraz, sorkuntza-potentzial handiena, 49,99 GWh/urteko. Hala ere, ekoizpen horrek bere urteko kontsumo handiaren (160,81 GWh/urteko) %31 inguru baino ez luke estaliko. Hirugarren sektoreak eta beste batzuek 17,51 GWh/urteko sor lezakete, 2023ko erreferentziazko kontsumoa (14,46 GWh/urteko) gaindituz.
“"Guztira, udalerriaren eguzki-energia sortzeko potentzial osoa 90,09 GWh/urtekoa da, 2023an 191,27 GWh-ko kontsumo globalaren aurrean. Horrek esan nahi du ekoizpen fotovoltaikoak elektrizitate-eskari osoaren %47 inguru estali dezakeela, egoitza- eta hirugarren sektoreetan autosufizientzia lortuz."
Azterlanaz gain, Udalak lineako ikusgailu interaktibo bat ere jarri du martxan, udal webgunean eskuragarri. Horri esker, herritarrek udalerriko edozein eraikinen eguzki-potentziala ezagutu dezakete. Tresnak teilatuaren edo lursailaren azalera osoari, panel fotovoltaikoak instalatzeko azalera erabilgarriari, instalatu daitekeen potentziari, sor daitekeen energiari eta saihestu daitezkeen CO₂ emisioei buruzko informazioa ematen du.
Tresnak instalazioaren kostu estimatuari buruzko informazioa ere ematen du, erabakiak hartzea eta inbertsioak lehenestea errazten duten adierazle osagarriekin batera. Laudioko Udalak, dagoeneko hainbat urte daramatza landa-eremuetan eguzki-farolak instalatzen, eta eguzki-mapa eta ikusgailu interaktibo honekin trantsizio energetikoarekiko konpromisoa indartzen du, herritarren eskura jarriz proiektu berriztagarriak eta autokontsumoa bultzatzeko informazioa.
Zenbait proiektu martxan daude dagoeneko hezkuntza-zentroen eskutik. Izan ere, 2024an, institutuak 72 eguzki-plaka instalatu zituen frontoiko teilatuan argi-faktura murrizteko; eta ikastolak ere beste 100 ditu, zentroak kontsumitzen duen energiaren zati handi bat sortzen dutenak.
