Mobilizazio honen helburu nagusiak gutxieneko soldata eta pentsio duinak bermatzea dira, baita arrakala matxista, arrazista eta belaunaldi-arrakala etetea ere. Horrez gain, zerbitzu publikoak sendotzea eskatuko dute, hezkuntza, osasuna eta zaintza eskubidea bermatzeko. Etxebizitzaren gaineko espekulazioarekin amaitzea eta industrian trantsizio ekosoziala bideratuz enplegua defendatzea ere aldarrikatuko dute.
“"Zerbitzu publikoak sendotzea, hezkuntza, osasuna edota zaintza eskubidea bermatzeko; etxebizitzaren gaineko espekulazioarekin amaitzea; eta industrian trantsizio ekosoziala bideratu eta enplegua defendatzea."
Nazioarteko egoerari dagokionez, LABek "zanpaketa eta gerra nonahi" ikusten duela adierazi du, eta kapitalismoa "sistema bortitza, koloniala eta heteropatriarkala" dela salatu du. Sindikatuak ohartarazi du patronala saiatuko dela Ekialde Hurbileko gerraren faktura langileei ordainarazten, prezioak garestituz eta enpleguari nahiz lan-baldintzei eraso eginez, aurreko krisietan gertatu bezala.
Martxoaren 17ko greba orokorra gogora ekarri dute, non Hego Euskal Herrian 100.000 lagun baino gehiago kalera irten ziren langile eta pentsiodun guztiei gutxieneko diru-sarrera bat bermatu behar zaiela adierazteko. Hala ere, patronalak greba horren aurrean "entzungor" egin duela salatu dute.
Azkenik, enpleguaren defentsan borrokan ari diren langileei elkartasuna adierazi diete, besteak beste, Aiaraldeko Maderas de Llodio eta Tubos Reunidoseko langileei. Manifestazioaren ondoren, 14:30ean, bazkaria egingo da Untzaga plazan, eta ondoren Nebar talde bergararraren kontzertua izango da.
