Eusko Jaurlaritzak atzera bota du Larrazabalgo auzokideek eta Aiaraldeko Mendiak Bizirik plataformak aurkeztutako gora jotzeko errekurtsoa, Ferosca I parke eolikoaren proiektuaren aurka. Industria Sailak adierazi du errekurtsoa aurkeztu zutenek ez dutela frogatu proiektuak kalteak eragingo dituenik.
“"Ezin dute sei aerosorgailutik hirura murriztu den proiektua onartu informazio publikoa eman gabe, proiektu tekniko finalik gabe, edota hirigintza txostenak eguneratu gabe."
Plataformak prentsa ohar bidez adierazi duenez, Jaurlaritzaren erabakia formalki legezkoa den arren, ez ditu aurkeztutako argudioak baloratu. Era berean, salatu dute Laudioko eta Amurrioko Udalak Jarraipen Batzordetik kanpo uztea irregulartasun zantzu bat izan daitekeela.
Nahiz eta Eusko Jaurlaritzak proiektua kautelaz gelditzea baztertu duen, plataformak eta auzokideek azpimarratu dute Industria Sailaren erabakiak ez duela prozedura amaitzen. Horrela, administrazioarekiko auzi-errekurtsoa aurkezteko aukera irekita dago oraindik.
Horretarako, bost arrazoi nagusi baliatuko dituzte: aurkeztutako eta onartutako proiektuen arteko desberdintasunak, udal hirigintza araudiekin bateraezintasuna, proiektuaren aldaketei buruzko informazio falta, udalen bazterketa eta lurraldean zein ingurumenean eragin ditzakeen kalte konponezinak.
