Saio horietan, parte-hartzaileek ekimenaren xehetasunak ezagutzeko aukera izango dute, baita kooperatibara batzeko dituzten zalantzak argitzeko ere. Ekiola Aiara irabazi asmorik gabeko kontsumitzaileen kooperatiba bat da, Amurrioko Udalak lagatako poligono batean kokatua.

Kooperatibak 610 Wp-ko 2.064 panel ditu, eta baita ibilgailu elektrikoak kargatzeko bost puntu ere eskualdean zehar, Laudion, Amurrion, Arespalditzan, Luiaondon eta Okondon. Ekimen hau Aiaraldean bizi diren edo negozio bat duten pertsonei zuzenduta dago, hala nola bizilagunei, merkatariak, enpresa txiki eta ertainei edo lehen sektoreko eragileei.

Sustatzaileek azpimarratu dutenez, kooperatibako kide izateak hainbat abantaila eskaintzen ditu, besteak beste, eskualdean ekoitzitako 0 kilometroko energia berdea kontsumitzea. Horrez gain, ez da lizentziarik edo baimenik izapidetu behar, ezta mantenuaz arduratu ere, eta ez da aldaketarik egin behar etxebizitzaren edo negozioaren instalazioetan.

Ekiola Aiara kooperatibak bazkide kontsumitzaile izatearen onura ekonomikoak ere nabarmendu ditu. Bizilagunek %15eko kenkari fiskalak jaso ditzakete. Gainera, 2026ko martxoaren 25ean Espainiako Diputatuen Kongresuan berretsitako 07/2026 Errege Lege Dekretuaren onarpenaren arabera, Ekiola Aiara autokontsumo kolektiboaren modalitatearen barruan kokatzen da. Horrek esan nahi du ingurune hurbilean kokatutako bazkideek abantaila ekonomiko gehigarriak lor ditzaketela, fakturan %30 eta %50 arteko aurrezkiak lortuz.

Energiaren prezioari dagokionez, sustatzaileek adierazi dute lehenengo urtean batez besteko prezioa eguzki-ordutegian gutxi gorabehera 29 euro/Mwh-koa izango dela (karguak, zergak eta bidesariak kanpo utzita). Proiektuaren balio-bizitza 30 urtekoa izango dela kalkulatzen da.