Aixerrotape Txirrindulari Elkarteak antolatutako ekitaldi honek kirola eta elkartasuna uztartuko ditu, emakumeen artean kirol praktika sustatzeko eta ikusarazteko helburuarekin. Irteera hau ez da lehiaketa hutsa; helburua komunitatea sortzea eta emakumeak bizikletara igotzera animatzea da, maila edozein dela ere.
“"Aukera paregabea izango da pedalei elkarrekin eragiteko, beldurrak alde batera utzita eta ingurune seguru batez gozatuz."
Gainera, bizikleta askatasuna eta osasuna aldarrikatzeko tresna bikaina dela gogorarazi dute. Apirilaren 26a, 1937ko bonbardaketaren eguna, hain berezia gernikarrentzat, elkarrekin indartsuagoak garela erakusteko balioko du.
Ibilbidea dinamikoa eta irisgarria izango da, 56,5 kilometrokoa eta 750 metroko desnibel positiboarekin. Martxa goizeko 09:00etan hasiko da Gernikako Merkurio iturrian, eta handik Gautegiz Arteaga, Laida, Laga, Ibarrangelu, Ereño, Nabarniz, Arratzu eta Mendata zeharkatuko ditu, Gernika-Lumo ra iritsi arte. Indarrak berreskuratzeko, hamaiketako goxoa eskainiko da Ereño herrian.
Ez dago izena emateko eperik, txirrindularitza maite duten emakumeen arteko topaketa librea baita. Giro ona, osasuna eta lagunarteko erronka izango dira goiz ahaztezin honetako protagonistak.
