Lehiaketak ikasleen ezagutza akademikoa eta esperientzia profesionala merkataritza-bideragarritasuna duten produktu zein zerbitzu bihurtzera bideratu nahi ditu. Epaimahaiak proposamenen originaltasuna, teknologiaren garapen maila, abantaila lehiakorra eta Garapen Jasangarrirako Helburuekin (GJH) duten lotura baloratu ditu.
Saritutako proiektuen artean, industria kimikorako konposatu jasangarriak, nekazaritzarako polinizazio-sistemak, datu zientifikoen analitika automatizatua eta larruazaleko eguzki-kalteak detektatzeko teknologia adimendunak nabarmendu dira. Halaber, hondakinen tratamendu mugikorra, mikroalgen laborantza eta hidrogeno-ihesak detektatzeko sistemak ere aintzatetsi dituzte.
Sari ekonomikoekin batera, irabazleek eta parte-hartzaileek Zitek programaren enpresa-zentroetan lan egiteko espazioa, aholkularitza espezializatua eta prestakuntza jasotzeko aukera izango dute, euren negozio-planak garatzeko eta jarduera ekintzailea abian jartzeko.
