Instalazio berri honek 14.500 euroko udal inbertsioa izan du, eta Energiaren Euskal Erakundearen (EVE) finantzaketa jaso du, trantsizio energetikoaren aldeko politiken barruan. Ekaitz Mentxaka alkateak adierazi duenez, ekimen honek "mugikortasun eredu iraunkorrago eta irisgarriago baterako urrats sendoak" suposatzen ditu, herritarrei ibilgailu elektrikoen erabilera erraztuz eta udalerriko isuriak murrizten lagunduz.
Kargagunea Arandiako aparkalekuan kokatuko da, hilerri eta eskoletarako sarbide kalean, haurrentzako jolasgunearen ondoan. Udaletxeak kokapen hau egokitzat jo du, bai erabiltzaileentzako irisgarritasunagatik, bai konexiorako beharrezkoa den koadro elektrikoarekiko hurbiltasunagatik. Obrak amaituta daude, eta kargagailua jartzea baino ez da falta martxan jartzeko.
“"Mugikortasun eredu iraunkorrago eta irisgarriago baterako urrats sendoak suposatzen ditu, herritarrei ibilgailu elektrikoen erabilera erraztuz eta udalerriko isuriak murrizten lagunduz."
Kargagune berria erdi-azkarra izango da eta bi turismo elektriko aldi berean kargatzeko aukera emango du. Gainera, aurretik erreserbatu ahal izango da eta mugikorreko aplikazio baten bidez edo txartel baten bidez aktibatu ahal izango da. Udal iturriek argitu dutenez, "izaera publikokoa" izango da.
Udalak adierazi duenez, hau ez da arlo honetan egingo duten ekintza bakarra, etorkizunean udalerriko beste gune batzuetan kargagune sarea zabaltzen jarraitzeko asmoa baitute.
