Bizkaiko Foru Liburutegiak eleberri beltzaren generoan sakontzeko hitzaldi ziklo bat jarri du martxan, 'Udaberri Beltza' izenburupean. Ekimen honek zinemaren eta literaturaren arteko loturak aztertuko ditu, genero honen alderdi desberdinak jorratuz. Saioak maiatzaren 5etik 26ra bitartean izango dira, asteartero, arratsaldeko 18:30etik 20:00etara, liburutegiko Prentsa Aretoan.

Zikloa Maria Eugenia Salaverriren hitzaldiarekin hasiko da maiatzaren 5ean, El género negro llevado al cine: de Estados Unidos a Euskadi izenburupean. Ondoren, maiatzaren 12an, Haizea Lópezek Heriotza eta hilketa eleberri beltzan gaia landuko du. Maiatzaren 19an, Xandra Bilbaok Mujeres que matan: la creación de asesinas fuera de estereotipos izeneko hitzaldia eskainiko du, eta zikloa Txemi Parraren eskutik amaituko da maiatzaren 26an, El rural noir. O cómo el entorno geográfico influye en la novela negra gaiarekin.

Hitzaldiak gaztelaniaz eta euskaraz eskainiko dira, eta Alex Oviedok aurkeztuko ditu. Sarrera librea izango da, aretoko edukiera bete arte, aurretiko erreserbarik gabe. Gainera, saio guztiak zuzenean jarraitu ahal izango dira streaming bidez, Bizkaiko Foru Aldundiaren webgunearen bitartez.