Programazio berriaren barruan, apirilaren 18an, Balmasedako La Encartada Fabrika-Museoak ¿Verdad o mentira? izeneko antzerki-proposamen murgiltzailea hartuko du. Ikuskizun honek ikusleak ehun urte baino gehiagoko fabrikaren historiaren bilbe batean murgilduko ditu, 1937ko Gerra Zibilaren testuinguruan kokatuta.
Antzezpenak, Marta Urcelay eta Braulio Cortésen zuzendaritzapean, Gurutze Beitia, Itziar Lazcano, Leire Orbe, Josu Angulo eta Alfonso Díez aktoreak bilduko ditu. Lantegian bertan egindako manta batetik abiatuta, egia erdiekin eta oroitzapen zatikatuekin eraikitako misterio bat argitu beharko dute ikusleek, museoko hainbat txokotan zehar taldeka mugituz.
Publikoa gai ote da zer den egia eta zer gezurra jakiteko?
Bestalde, maiatzaren 9an, Muskizeko Muñatones Gazteluan Ez da kasualitatea bertso saio feminista eskainiko da, 19:00etan. Ikuskizun hau berdintasun teknikari baten eskariz sortu zen, emakumezko bertsolari, moderatzaile eta musikariak bilduz. Ordutik, Euskal Herriko plazetan erreferentziazko emanaldi bihurtu da.
Ez da kasualitatea bat-bateko musika-emanaldia da, non bertsolariek gitarra, biolina eta saxoa oinarri hartuta bertsoak sortzen dituzten, moderatzaileak proposatutako gaietatik abiatuta. Umorea, jolasa, hausnarketa eta interpreteen arteko konplizitatea uztartzen dituen euskarazko ikuskizuna da. Bertaratzeko erreserbak apirilaren 9tik aurrera egin ahal izango dira.
MusEkintza programak Bizkaiko museoak eta enklabe historikoak agertoki berezi bihurtzen ditu, antzerkia, dantza, musika, umorea eta esperientzia murgiltzaileak uztartuz. Ibilbide artistiko honen parte dira, besteak beste, Santimamiñe (Kortezubi), Arrantzaleen Museoa (Bermeo), Euskal Herria Museoa (Gernika-Lumo), El Pobaleko Burdinola (Muskiz) edo Arkeologia Museoa (Bilbo).
