Eusko Jaurlaritzako Osasun Sailak jakinarazi duenez, larunbat arratsaldeko 19:00ak arte, Euskadiko larrialdi zerbitzuek 33 pertsona artatu dituzte bero-boladaren eraginez. Zorionez, ez da kasu larririk izan.
Artatutako pertsona horietatik, bost in situ artatu zituzten, eta beste 28ak anbulantziaz eraman zituzten ospitalera edo osasun zentrora jarraipena egiteko. Artatutakoen adina zabala zen, 2 urtetik 96 urtera bitartekoa.
Aipatutako kasuak lurraldeka banatuta, Gipuzkoan 16 pertsona artatu zituzten, Bizkaian 15 eta Arabako lurraldean bi.
Gure osasuna babesteko, jarraitu beti Bero Planaren gomendioak.
Eusko Jaurlaritzako Osasun Sailak gogorarazi du garrantzitsua dela Bero Planaren 2026 gomendioak jarraitzea, tenperatura altuek osasunean izan dezaketen eragina prebenitzeko eta murrizteko, batez ere hilabete beroenetan. Bereziki, kolektibo zaurgarrienei erreparatu behar zaie: 4 urtetik beherako umeak, adinekoak, haurdunak, gaixotasun kronikoak dituztenak eta kanpoan jarduera fisikoa egiten dutenak.
Gainera, gomendatzen da bakarrik bizi diren adinekoekin maiz harremanetan jartzea eta ez uztea inor ibilgailu partikular batean itxita, batez ere eguerdiko orduetan.
