Aurtengo Itzuliak une gogoangarri ugari utzi ditu, eta horien artean, Goierriko txirrindularien jarduna azpimarratzekoa da. Ion Izagirrek, bere azken Itzulian, podiuma eskura izan bazuen ere, laugarren postu bikaina lortu du. Alex Aranburuk, berriz, laugarren etapa irabazi zuen Galdakaon (Bizkaia), azken kilometroetan egindako igoera ikusgarri bati esker.
Cofidis taldeko bi txirrindulari horiekin batera, beste bi goierritarrek egin dute debuta Euskal Herriko lasterketa ospetsuan Euskaltel-Euskadi taldearekin: Nikolas Alustiza zumarragarrak eta Gari Ugarte legazpiarrak. Lasterketako izar nagusia Decathlon taldeko Paul Seixas txirrindulari frantziarra izan da, garaipen eztabaidaezina lortuz. Podiuma Florian Lipowitz (Red Bull-Bora) eta Tobias Halland Johannessenek (Uno-X Mobility) osatu dute.
“"Hasieran penarekin, podiumetik kanpo geratu naizelako, baina hotzean aztertuta Itzulia hasi aurretik sinatuko genukeen emaitza izan da; Aranbururen etapa garaipena eta laugarren postua sailkapen nagusian. Pozik egoteko Itzulia egin dugula uste dut."
Izagirre, Ormaiztegikoa, pozik agertu da emaitzarekin, nahiz eta podiuma galdu. Apirilaren hasieran Lizarran (Nafarroa) jokatutako Miguel Indurain Saria hirugarren aldiz irabazi ondoren iritsi zen Itzulira. Txirrindulariak denboraldi honen amaieran hartuko du erretiroa, 17 urteko ibilbide profesionalaren ostean, eta Itzulia beti izan dela bere lasterketa kuttunetako bat adierazi du.
Alex Aranburuk ere ez du ahaztuko aurtengo edizioa. Lasterketaren hasiera zaila izan zela aitortu du, baina laugarren etapan egoera irauli eta garaipena lortu zuen Galdakaoko helmugan, Johannessen eta Scaroni gaindituz. Hau izan da Ezkiotarraren hirugarren etapa garaipena Itzulian, lehena 2021ean eta bigarrena iaz Beasainen lortu baitzituen. Aurten, garaipena familiarekin eta lagunekin ospatu ahal izan du.
Cofidis taldeko bi txirrindularien hurrengo hitzordua Herbehereetako Amstel Gold Race klasikoa izango da, datorren igandean.
