Izena emateko prozesua hasita dago jada, eta interesdunek maiatzaren 6ra arte dute aukera aurreinskripzioa egiteko. Horretarako, ezinbestekoa da abonatu txartela izatea. Izena emateko bi bide daude: online bidez edo Getxo ko bi kiroldegietako arreta bulegoetan aurrez aurre. Plazen zozketa eta behin betiko esleipena maiatzaren 8an egingo dira.

Udako programazioak haur eta gazteak ditu ardatz nagusi, baina helduentzako eta 60 urtetik gorakoentzako eskaintza ere badago. Azken horien artean, entrenamendu funtzionala nabarmentzen da, gero eta eskaera handiagoa duen modalitatea baita.

Haurrentzako eskaintzan, 4 eta 14 urte bitartekoentzako aisialdi eta kirol anitzeko ikastaroak dira aipagarrienak. Ikastaro hauek astelehenetik ostiralera goizez egingo dira, bost orduko saioetan. Familientzat erraztasunak ere eskainiko dira, jarduera hasi aurretik eta ondoren zaintza zerbitzua egongo baita. Gainera, egunero ordubeteko ingeles saio bat emango da.

Horrez gain, Grand Slam izeneko ikastaroek 8 eta 16 urte bitarteko gazteei tenisa, padela eta uretako jarduerak uztartzeko aukera emango diete. Igeriketa eskolak ere antolatuko dira, 4 eta 17 urte bitartekoentzat.

Interesa dutenek udako eskaintza osoa jasotzen duen liburuxka kontsulta dezakete. Liburuxka kiroldegietako bulegoetan eskuragarri dago, edo Getxo Kirolak-en webgunean deskargatu daiteke.