Txapelketa Hazparnen abiatuko da eta Nafarroa Arenan jantziko diote txapela irabazleari. Guztira hamabost saio izango dira. Lehen fasean zazpi saio izango dira, lurralde bakoitzean bana: Hazparne (irailak 19), Altsasu (irailak 26), Lekeitio (irailak 27), Donapaleu (urriak 3), Tolosa (urriak 4), Gotaine-Irabarne (urriak 10) eta Agurain (urriak 11). Fase honetan, 42 bertsolarik kantatuko dute, eta Iturriotzek Tolosako saioan parte hartuko du.

Talde bakoitzeko irabazlea zuzenean sailkatuko da hurrengo fasera. Puntu gehien batzen dituztenekin osatuko da finalaurrekoetara igaroko den taldea. Guztira, 17 bertsolari arituko dira finalaurrekoetan, eta horiei 2022ko sei finalista gehituko zaizkie: Amets Arzallus, Alaia Martin, Aitor Mendiluze, Sustrai Colina, Beñat Gaztelumendi eta Nerea Ibarzabal.

Finalaurrekoak bi itzulitan izango dira. Lehenengo itzulia lau saiotan banatuko da: Larraun-Lekunberri (urriak 24), Eibar (urriak 31), Gernika-Lumo (azaroak 7) eta Miarritze (azaroak 14). Bigarren itzulia, berriz, hiru saiotan izango da: Donostian (azaroaren 21ean), Gasteizen (azaroaren 28an) eta Bilbon (abenduaren 5ean).

Abenduaren 20an jokatuko den finalean, Nafarroa Arenan, iazko txapelduna, Maialen Lujanbio, eta finalaurrekoetako zazpi onenak lehiatuko dira.

Saio guztietarako sarrerak ekainaren 17an jarriko dira salgai bertsosarrerak.eus atarian. Bertsozale Elkarteko bazkideek finaleko sarrera erreserbatua izango dute ekainaren 17tik 24ra bitartean.