Taldeak bi kontzertu baieztatu ditu Bilbon: lehena maiatzaren 10ean izango da, Zurbaranbarri auzoko jaietan, eta doakoa izango da. Bigarren hitzordua abuztuaren 23an izango da Kafe Antzokian, Aste Nagusiaren programazioaren barruan, eta sarrerak salgai daude jada.
Jevo-k 2006an sortu zuen El Reno Renardo, proiektu paralelo gisa, heavy metal eta umorea uztartuz dibertitzeko asmoz. Hasieran modu anonimoan autoeditatu zituzten lehen bi diskoak, baina arrakasta ikusita, 2009an talde gisa finkatu ziren.
Taldeak zortzi disko argitaratu ditu dagoeneko, eta sare sozialetan fenomeno bihurtu da, ia 15 milioi erreprodukzio baino gehiago dituelarik Youtube-ko kanal ofizialean. Haien abestiak plataforma digital guztietan daude eskuragarri, Maldito Records zigiluarekin duten akordioari esker.
Guk nahi duguna egiten dugu, eta kito.
El Reno Renardo-k beti aldarrikatu du bere bidea egitea. 150 abesti baino gehiago konposatu dituzte eta zuzeneko emanaldiekin dirua irabazi dutela harro esan dezakete. Taldekideek gogoratzen dute Jevo gitarrarekin 'monguerkeriak' egiten hasi zenetik 20 urte igaro direla, eta hasierako ametsak eta ilusioak gaur egungo arrakasta bihurtu direla, aretoak betez eta milioika erreprodukzio lortuz Spotify bezalako plataformetan.
Duela gutxi argitaratu dute hamargarren estudio-lana, Queso fresco, queso curao (Maldito Records), non abesti berriak eta zahar berrituak tartekatzen dituzten. Bilbotarrek diotenez, diskoa “roquefort iraungitua bezain indartsua” da, eta dagoeneko eskuragarri dago plataforma guztietan.
Disko berriak 14 abesti biltzen ditu, hala nola Sonda anal, Yisuscraist, No quiero ir al gym, Tonto del pueblo, Amamos la birra, Toroturadores eta Vomito. Abesti horietan heavy klasikoaren bideak jorratzen dituzte, eta guztiaz eta guztiez barre egiten jarraitzen dute, politika, sexua, futbola, erlijioa, zezen-mundua, ultraeskuina, negazionismoa edo gorputzaren gehiegizko gurtza bezalako gaietan murgilduz. Mecano-ren Allí me colé abestiaren bertsio bat ere sartu dute, letra aldatu eta teklatuekin, baina beren mundu jostalariari egokituta.
