Bizkaiko Elikagai Bankuak Basauriko biltegi nagusian egiten duen lana nabarmendu dute Nerea Melgosa eta Itziar de La Peña, boluntarioen eta elkarte sozialen laguntzarekin. Egunero, 60 boluntario inguru (guztira 177 txandaka) arduratzen dira goizeko 07:30etik eguerdiko 13:00etara bitartean jasotzen diren elikagaiak biltzeaz, sailkatzeaz, biltegiratzeaz eta bidaltzeaz. Zortzi furgonetaren laguntzarekin, egunero 50 supermerkatu ezberdinetatik iraungitzear dauden produktuak (esnekiak, fruta, barazkiak, haragia...) jasotzen dituzte.
Jasotakoan, behar gehien duten familiei banatuko zaizkien loteak sortzen hasten dira. Produktu freskoetarako espazioaz gain, pasta, olioa, tomate kontserbak eta esnea bezalako produktuak gordetzeko gune bat dute, baita lau izozkailu erraldoi ere.
Elikagai Bankuak 142 elkarte txertatu rekin du harremana, hauek baitira lurralde osoan banaketaz arduratzen direnak. Elikagaiak modu planifikatuan banatzen dituzte gizarte-jantokien, aterpetxeen eta behar duten familien artean.
Nerea Melgosa, Ongizate, Gazteria eta Erretemorako sailburuak adierazi duenez, sailaren aldetik Elikagai Bankuari ematen zaion laguntza ekonomikoak ekintza komunitarioa indartzen du. "Bizkaiko elkartasun sare duina, indartsua, eskuzabala eta eredugarria osatzen dute, eta beti izango dute Eusko Jaurlaritza haien alde. Egiten duten lana izugarria da, kalitate oneko janaria eta higiene produktuak etxe guztietara iristea bilatzen dute, eta gainera bertan lan egiten duten pertsona guztiak boluntarioak dira. Gure altxor preziatuenak dira eta beti egongo gara prest haiei laguntzeko, boluntarioak baitira gure komunitatearen oinarria", esan du Melgosak.
Elikagai Bankuko kideen hitzetan, elkartearen helburua ez da familia beharren elikadura osoa ordeztea, baizik eta egunerokoa osatzea. Gainera, boluntario gehiago izatearen beharra azpimarratu dute, horretarako voluntariado@bancali-biz.org helbide elektronikoa erabilgarri dago.
