Bilboko Bizkaia Aretoan ospatutako "Ongizate Korporatiboa Laneko Osasunean" ikastaroak laneko osasunaren bilakaerari buruzko ikuspegi eguneratua eskaini du, pertsonen ongizatea ardatz duten ereduetarantz. Jardunaldiaren irekieran, Lourdes Iscar, Osalaneko zuzendari nagusiak, nabarmendu du Laneko Medikuntza eta Erizaintzako espezialitateek duten garrantzia laneko osasuna eta segurtasuna sustatzeko.
Topaketak izaera diziplina anitzekoa izan du, eta hainbat ponentzia izan dira. Besteak beste, erizaintzaren ikuspegiak erakundeetako ongizatean duen ekarpena, enpresa osasuntsu eta jasangarrien ereduetarantz egindako aurrerapausua, eta Work On kontzeptua landu dira, zientzia lan-ingurunera aplikatuz taldeen osasun fisiko eta mentala optimizatzeko. Era berean, profesionalen osasuna hobetzeko aplikazioen erabileraren eta ongizatea enpresa-kulturan integratzearen esperientzia praktikoak aurkeztu dira.
“"Gaur egungo laneko osasunaren kudeaketan paradigma aldaketa bat gertatu da, kaltearen kontrol klasikoan zentratutako eredu batetik pertsonan zentratutako ikuspegi integral baterantz."
Ikastaroaren azken zatian, Osalaneko Laneko Erizaintzako Espezialistek eta Laneko Osasuneko Teknikariek, Begoña Salgado, Amaia Etxebarria eta Eneritz Urruzola, parte hartu dute. Beren hitzaldian, laneko osasunaren kudeaketaren paradigma aldaketa aztertu dute, eta nabarmendu dute laneko erizaintzak duen eginkizun estrategikoa osasun arazoak goiz detektatzeko eta erakundeen barnean ongizatea sortzeko.
Halaber, arlo horretako itxaropenak, oztopoak eta benetako beharrei buruzko inkesta baten ondorioak aurkeztu dituzte. Azkenik, osasun sustapenerako programa jasangarriak diseinatu, ezarri eta ebaluatzeko metodo praktiko baten oinarriak ezagutarazi dituzte.
