Berrizko mugimendu feministak haserre eta saminduta agertu du bere jarrera, halako eraso larriak oraindik gertatzen jarraitzeak sortzen dien amorrua azpimarratuz. Sare sozialetan zabaldutako ohar baten bidez, argi utzi dute ez dutela onartzen, ezta onartuko ere, emakumeen aurkako indarkeriaren inolako adierazpenik.

Arratsalde honetako mobilizazioa 18:30ean abiatuko da udaletxetik. Mugimendu feministak herritar guztiak deitu ditu gertatutakoaren aurrean “irmo eta batera” erantzutera. Era berean, babesa, hurbiltasuna eta elkartasuna adierazi dizkio biktimari, eta prestutasuna agertu du hari behar duen guztian laguntzeko.

Bestalde, Berrizko Udaleko alderdi politikoek “irmotasunez” gaitzetsi dute erasoa, adierazpen instituzional bat kaleratuz. Bertan, “elkartasun osoa” adierazi diote biktimari, eta haren “lehenbailehen sendatzea” desiratu dute. Udalak gogorarazi du indarkeria matxistak giza eskubideak larritasunez urratzen dituela, eta emakumeen duintasunari eta osotasun fisikoari eta moralari eraso egiten diela.

Horregatik, Berrizko Udalak neurriak bultzatuko ditu udal-erakundeek eta herritarrek berehalako erantzunak eman ditzaten, biktimari lehentasunezko arreta eskaintzeko, prebentzio-jarduketak garatzeko eta erasotzaileen gizarte-zigorgabetasuna ez onartzeko. Udalak herritarrak ere deitu ditu emakumeen kontrako indarkerien aurrean gaitzespena aktiboki erakustera.