Eusko Jaurlaritzako Ongizate, Gazteria eta Erronka Demografikoaren Sailak 22.202 eskaera jaso ditu uztailaren 1ean indarrean jarri zenetik, seme-alabak dituzten familiei zuzendutako laguntza ekonomikoak zabaltzen dituen dekretuaren harira. Neurri honek 4 urte arteko ume bakoitzeko 200 euroko hileko prestazioa aurreikusten du, eta Euskadin familia eta jaiotza sustatzeko laguntza publikoa indartzen du.
Orain arte Euskadin jasotako 22.202 eskaeretatik, 11.298 Bizkaian, 7.519 Gipuzkoan eta 3.385 Araban aurkeztu dira. Jasotako eskaera guztietatik, 11.700 dagoeneko tramitatu dira, eta lehenengo 7.064ei dagokien ordainketa azaroaren lehen hamabostaldian jasoko dute.
Zenbaki honetatik, 6.910 espediente 0 eta 4 urte bitarteko familien eskaerak dira (2026ko dekretuari dagozkionak) eta 154 espediente 0 eta 3 urte bitarteko familien eskaerak (2023ko dekretuari dagozkionak). Neurriak 2026ko urtarrilaren 1etik aurrerako atzeraeragina izango du, eta ordainketa osoa dagokion kalkuluarekin egingo da.
Gainera, urte amaierarako beste 4.000 espediente ordaintzeko aurreikuspena dago. "Guraso izateko erabakia ez da soilik diru-laguntza hau jasotzeko aukeran oinarritzen, baina egia da seme-alabak dituzten familiak sortzea erabakitzen duten pertsonei laguntzeko konpromiso irmoa dela", adierazi du Nerea Melgosa sailburuak.
Jasotako 22.202 eskaeretatik, 1.011 familia ugariei eta familia monoparentalei dagozkie. Sailburuak gaineratu duenez, familia guztien eskaeren kopurua hazten ari da eta familiek oso ondo hartu dute laguntzen luzapena.
Laguntzak lau urte arte luzatzeak 33,3 milioi euroko inbertsio gehigarria suposatzen du. Ekimen honekin, Ongizate, Gazteria eta Erronka Demografikoaren Sailak aurrera egiten du familiei laguntzeko konpromisoan, hazkundearekin lotutako gastu estraordinarioei aurre egiten laguntzeko apustuan eta haurren ongizatea eta jaiotza sustatzen dituzten politika publikoak sendotzeko nahian.
Laguntza hauek eskatzeko epea zabalik dago oraindik. Eskatzaileek Euskadin erroldatuta egon behar dute, gutxienez urtebeteko antzinatasunarekin, edo azken hamar urteetan bost urtekoa. Gainera, adingabearekin bizi eta haren zaintza izan behar dute laguntza jasotzen den aldian. Neurriak 2026ko urtarrilaren 1etik aurrerako atzeraeragina izango du. Eskaerak www.euskadi.eus helbidean aurkez daitezke, eta zalantzak argitzeko umeak@euskadi.eus helbide elektronikoa eta 945 01 80 00 telefono zenbakia dituzte eskura.
